Xitay da'iriliri Uyghur “Yéza éshinche emgek küchliri” ni yötkeshni dawamliq kücheytmekte

• Muxbirimiz erkin
  2019-04-05

Xitay hökümiti Uyghur rayonidiki “Yéza éshinche yéza emgek küchliri” ni yötkep ishqa orunlashturush namida yash Uyghur yéza emgek küchlirini yötkeshni dawamliq kücheytmekte.

Uyghur aptonom rayonluq adem bayliqi we ijtima'iy parawanliq nazaritining xitay taratqulirigha ashkarilishiche, da'iriler bu yilning deslepki 3 éyida 520 ming 660 neper “Yéza éshinche emgek küchi” ni yötkigen. Da'iriler shinxu'a agéntliqigha bergen uchurida bu emgek küchlirining qaysiy rayonlargha we qandaq xizmet orunlirigha yötkelgenlikini tilgha almighan.

Uyghur kishilik hoquq teshkilatlirining ilgiri sürüshiche, xitay hökümiti “Yéza éshinche emgek küchliri” ni ishqa orunlashturush namida teshkillik halda xitay ölkilirige we rayondiki sana'et bazilirigha yötkep, Uyghur yéza yashlirini jenubtiki wilayet-oblastlardin bashqa rayonlargha tarqaqlashturmaqta iken. Uyghur aptonom rayonluq partkom bu yil “Yéza éshinche emgek küchliri” ni yötkeshni 2 milyon 700 ming adem qétimgha yetküzüshni pilanlighan. Da'iriler ötken yili 2 milyon 800 ming “Yéza éshinche emgek küchi” ni yötkigen idi.

Shinxu'a agéntliqining xewiride ashkarilishiche, bu yilning deslepki 3 éyida yene jenubtiki 3 wilayet bir oblastta 45 ming adem ishqa orunliship, ötken yilning oxshash mezgilidin 30 pirsenttin artuq ashqan. Xitay da'iriliri ötken yilning axirliri we bu yilning bashlirida Uyghurlar zich olturushluq jenubtiki wilayet‏-oblastlargha ichkiri xitay ölkiliridin zor türkümde xizmetchi qobul qilish élanlirini chiqarghan. Közetküchilerning ilgiri sürüshiche, xitay hökümiti lagér sirtidiki “Uyghur yéza emgek küchliri” ni bashqa rayonlargha yötkep, lagérgha solan'ghan Uyghurlarning xizmet ornini ichkiri xitaydin yötkep kelgen xitaylar bilen toldurmaqta iken.