Uyghur élining jenubidiki emgek küchlirini yötkesh dawamlashmaqta

Muxbirimiz irade
2016-07-14
Share

Uyghur aptonom rayon da'iriliri bu yilning aldinqi yérimidila yézilardiki emgekchilerdin bir milyon 504 ming adem qétim yötkep ishqa orunlashturush pilanini ishqa ashurghanliqini bildürdi.

Tengritagh torining xewiride éytilishiche, yötkep ishqa orunlashturulghan bu kishiler “ Artuq emgek küchliri” dep atalghan bolup, mezkur yéza emgek küchlirini özliri turuwatqan jaylargha yéqin etrapqa yötkep ishqa orunlashturush, Uyghur rayonining ichide rayon halqip ishqa orunlashturush, yeni shimal bilen jenub arisida yötkep orunlashturush usulliri qollinilghan.

Emma xewerde, bu kishilerning qeyerde, qandaq orunlarda xizmetke orunlashturulghanliqi tilgha élinmighan.

“Éshincha, yeni artuq emgek küchlirini yötkep orunlashturush”, bolupmu, Uyghur rayonining jenubidiki Uyghur emgek küchini yötkep ishlitish xitay hökümiti jiddiy élip bériwatqan siyasetlerning biri dep qaralmaqta. Xewerdin qarighanda, bu yilning aldinqi yérimidila bir yil ichide jem'iy 2 milyon 200 adem qétim yötkesh xizmet nishanining 68 pirsenti orundilip bolun'ghan.

Mezkur hökümet xewiride ashkarilinishiche, yéza éshincha emgek küchlirini Uyghur rayonidin ichkiri ölkilerge, bolupmu Uyghur rayonigha yardem bérish namida biwasite alaqe qiliwatqan ölke we sheherlerge ewetip orunlashturushqa alahide ehmiyet bérilip, ichkirige ewetilgenlerning sani téximu ashurulup, bu yil 18 ming 300 adem qétimgha yetküzülgen.

Uyghur rayonining jenubidiki yéza-qishlaqlardiki Uyghur yash qizliri we oghullirini éshincha emgek küchi süpitide ichkirige yötkep zawutlarda ishlitish, bu xizmetlerde mejburlash ehwali körülgenliki we ishlemchilerning ish heqqining töwen bolushi Uyghurlar arisida her xil naraziliq inkaslirini peyda qilghan idi. 2009-Yili, gu'angdungning shawgü'en rayonidiki oyunchuq zawutida yüz bergen Uyghur yéza éshincha emgekchiliri bilen xitay ishchilar arisidiki toqunush weqesi jem'iyette téximu köp ghulghulilargha seweb bolghan idi.

Da'iriler, Uyghur rayonining jenubidiki yézilardiki artuq emgekchilerni yötkep ishqa orunlashturushni yézilardiki emgekchilerning éhtiyajdin éship kétish mesilisini hel qilish, namratliqtin qutulup béyishni ishqa ashurush, milletler ittipaqliqini ilgiri sürüshning muhim yoli, dep teshwiq qilghan. Biraq, chet'ellerdiki kishilik hoquqi teshkilatliri, bolupmu dunya Uyghur qurultiyining bayanatlirida buni xitay hökümitining Uyghurlarni tarqaqlashturush we téximu köp xitay ahalisini Uyghurlar köp sanliqni igiligen jenubiy rayonlargha yötkep Uyghur nopusini öz yurtida az sanliqqa chüshürüsh üchün élip bériwatqan heriket dep qarimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet