Uyghur diyaridiki qurban héytliq “Étibar siyasetler” bashlandi

Washin'gtondin muxbirimiz eziz teyyarlidi
2024.06.05

Xitay bashqurushidiki “Tengritagh tori” ning 5-iyundiki xewiride éytilishiche, Uyghur aptonom rayonluq qatnash nazariti 2024-yilliq qurban héyt mezgilide, yeni 17-iyundin 19-iyun'ghiche bolghan ariliqta Uyghur diyaridiki herqaysi tashyollarda mangghan yette kishilik yaki uningdin az orunduqluq mashinilardin yol heqqi élinmaydighanliqini élan qilghan. Uqturushta yene alahide qilip xitaylarning “Du'enwu bayrimi” mezgilide bu xil étibar charisining yolgha qoyulmaydighanliqi eskertilgen.

Melum bolushiche, qurban héyt uzundin buyan islam dinidiki kishilerning diniy bayrimi süpitide ötküzülüp kelmekte. Emma Uyghur diyaridiki siyasiy basturush we qirghinchiliqta islam dini bilen alaqidar bolghan hemmila shey'ining jinayetleshtürülüshi tüpeylidin köpligen diniy pa'aliyetler we tebrikleshlerning ghayib bolghanliqi melum bolmaqta. Xitay hökümitining bu xildiki diniy bayram mezgilide, yene kélip xitaylar üchün “Ehmiyetsiz” dep qarilidighan qurban héyti mezgilide sayahetke chiqquchilar sani anche köp bolmaydighan Uyghurlar üchün bu xil “Étibar siyasiti” ni yolgha qoyushi nöwette bir türlük “Köz boyamchiliq” dep qariliwatqanliqi melum.

Yéqinqi mezgillerde xelq'arada qaytidin tekitliniwatqan Uyghurlar mesilisi, shuningdek xitayning ottura sherq we islam dunyasi bilen bolghan alaqisini kücheytish arzusi tüpeylidin xitay hökümiti özlirining xelq'aradiki obrazini perdazlashqa zor küch bilen urunup kelmekte. Türkiye tashqi ishlar ministiri xaqan fidanning ürümchi we qeshqerni ziyaret qilish mezgilide otturigha chiqqan bu siyasetning arqisigha némilerning yoshurun'ghanliqi heqqide hélihem türlük texminler mewjut.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.