Язғучи әхәт турди үрүмчидә аләмдин өткән

Мухбиримиз ирадә
2018-07-05
Елхәт
Пикир
Share
Принт

Уйғур һазирқи заман әдәбиятидики көзгә көрүнгән язғучиларниң бири болған әхәт турди 2018-йили 5-июл күни үрүмчидә кесәл сәвәби билән аләмдин өткән. Униң вапати вәтән ичи вә чәтәлләрдики уйғур җамаитини күчлүк қайғуға чөмдүрди.

Мәрһум язғучи вә журналист әхәт турди өзиниң «унтулған кишиләр», «һаят шундақ», «ай ямғури», «қабаһәт», «сәрсан роһ», «йәкчәшмә», «кона куча» намлиқ романлири һәмдә «гүлхан», «қиянлиқ дәря», «бәхтсиз сәидийә», «гиримсән йоллар», «қәтрә» қатарлиқ һекайиләр топлими вә повестлири билән оқурмәнләрниң күчлүк алқишиға еришкән язғучи иди. Чәтәлләрдики уйғур әдиблириниң қаришичә, әхәт турди әсәрлиридики реал темилар вә җанлиқ персонажлар образи арқилиқ уйғурларниң бүгүнки заман иҗтимаий һаятини ярқин йорутуп бәргән истедатлиқ уйғур язғучилириниң бири икән. Униң йеңи дәвр уйғур әдәбияти вә уйғур романчилиқиниң тәрәққиятиға қошқан төһписи көрүнәрлик икән. 

Мәрһум әхәт турди 1940-йили 11-айда қәшқәр шәһиридә қол һүнәрвән аилисидә дуняға кәлгән болуп, 1959-йили шинҗаң университетиниң тил-әдәбият факултетиға оқушқа киргән. Оқуш пүттүргәндин кейин «тарим» журнилида муһәррир вә кейинчә муавин баш муһәррир болуп ишлигән. Мәрһум әхәт турди әдәбий иҗадийәт саһәсигә 1958-йили «тарим» журнилида елан қилинған «гүрүч» намлиқ һекайиси билән кирип кәлгән икән. Чәтәлләрдики уйғур зиялийлири мәрһумниң вапатини уйғур әдәбияти үчүн зор йоқитиш, дәп қаримақта.

Пикирләр (0)
Share
Толуқ бәт