Yazghuchi exet turdi ürümchide alemdin ötken

Muxbirimiz irade
2018.07.05

Uyghur hazirqi zaman edebiyatidiki közge körün'gen yazghuchilarning biri bolghan exet turdi 2018-yili 5-iyul küni ürümchide késel sewebi bilen alemdin ötken. Uning wapati weten ichi we chet'ellerdiki Uyghur jama'itini küchlük qayghugha chömdürdi.

Merhum yazghuchi we zhurnalist exet turdi özining “Untulghan kishiler”, “Hayat shundaq”, “Ay yamghuri”, “Qabahet”, “Sersan roh”, “Yekcheshme”, “Kona kucha” namliq romanliri hemde “Gülxan”, “Qiyanliq derya”, “Bextsiz se'idiye”, “Girimsen yollar”, “Qetre” qatarliq hékayiler toplimi we powéstliri bilen oqurmenlerning küchlük alqishigha érishken yazghuchi idi. Chet'ellerdiki Uyghur ediblirining qarishiche, exet turdi eserliridiki ré'al témilar we janliq pérsonazhlar obrazi arqiliq Uyghurlarning bügünki zaman ijtima'iy hayatini yarqin yorutup bergen istédatliq Uyghur yazghuchilirining biri iken. Uning yéngi dewr Uyghur edebiyati we Uyghur romanchiliqining tereqqiyatigha qoshqan töhpisi körünerlik iken. 

Merhum exet turdi 1940-yili 11-ayda qeshqer shehiride qol hünerwen a'iliside dunyagha kelgen bolup, 1959-yili shinjang uniwérsitétining til-edebiyat fakultétigha oqushqa kirgen. Oqush püttürgendin kéyin “Tarim” zhurnilida muherrir we kéyinche mu'awin bash muherrir bolup ishligen. Merhum exet turdi edebiy ijadiyet sahesige 1958-yili “Tarim” zhurnilida élan qilin'ghan “Gürüch” namliq hékayisi bilen kirip kelgen iken. Chet'ellerdiki Uyghur ziyaliyliri merhumning wapatini Uyghur edebiyati üchün zor yoqitish, dep qarimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.