Amérika fédératsiye tekshürüsh idarisi xitayning amérikadiki Uyghurlargha parakendichilik séliwatqanliqini agahlandurghan

• Muxbirimiz erkin
  2021-09-03

Amérika fédératsiye tekshürüsh idarisi (FBI) xitay da'irilirining amérikadiki Uyghurlarni hem shexs hem reqemlik téxnikilarni ishlitip qorqitiwatqanliqi we parakendichilik séliwatqanliqini agahlandurghan. “Yaxu xewerliri” ning ashkarilishiche, fédératsiye tekshürüsh idarisi bu agahlandurushni özining yéqinda tarqatqan doklatida eskertken.

Doklatta: “Tüzümge xilap bu tehditlerning amérikada turushluq shexslerning xitaydiki a'ilisi yaki dostlirini tutqun qilish, xitaydiki mal-mülkini tartiwélish, reqemlik yaki shexsler bilen parakendichilik sélish, mejburiy qayturup kétishke urunush, kompyutérni xakkérlash, reqemlik hujum qilish, torda yalghan wakaletlik qilish qatarliqni öz ichige alidighanliqi” tekitlen'gen.

Doklatta, buninggha a'it töt weqe misal keltürülgen bolup, bu erkin asiya radi'osi Uyghur bölümi muxbirlirining a'ile ezaliridin öch élish weqelirinimu öz ichige alghan. Doklatta yene xitay da'irilirining 2019-yilidin 2021-yili 3-ayghiche ündidar arqiliq amérikadiki bir Uyghur ayalgha Uyghurlarning kemsitishke uchrawatqanliqini ashkara tilgha almasliq toghrisida tékist we awazliq telqinde bolghanliqi, kéyinrek bu ayalining a'ile ezalirining lagérgha élip kétilgenliki körsitilgen.

Doklatta bu Uyghur ayalning ismi tilgha ilimighan bolsimu, biraq amérikada turushluq qelbinur ghéni radiyi'omizda korlidiki xitay emeldarlirining uning bilen sözliship, a'ilisige tehdit salghanliqini ashkarilighanidi. FBI Ning doklatida yene “Amérika hökümiti xitay emeldarlirini jazalighan we ötken yili xitayning shinjangdiki kishilik hoquq, démokratiye depsendichilikige qarshi ammiwi we diplomatik bésimini kücheytken bolsimu, biraq xitay hökümiti bu herikitini dawamlashturuwatidu……. Uning chégra halqighan basturush herikiti amérika qanunliri we shexslerning hoquqigha xilapliq qilmaqta” déyilgen.