Американиң филиппинда турушлуқ әлчиханиси: “‏уйғур тутқунларни қоюп бериш чақириқиға қетилишиңларни үмид қилимиз”

Американиң филиппинда турушлуқ әлчиханиси өзиниң тветир һесабида баянат елан қилип, филиппинлиқларни америка вә униң иттипақдашлириниң хитай һөкүмити тәрипидин тутқун қилинған уйғур мусулманлирини дәрһал қоюп бериш чақириқиға аваз қошушушини үмид қилған.

Америка әлчиханиси роза һейтниң һарпа күни йәни 4‏-июн күни елан қилған баянатида, америка ташқи ишлар министирлиқиниң “һәмбәһр америка” намлиқ рәсмий торида елан қилинған уйғурлар һәққидики мақалини көчүрүп басқан. “хитай даирилири мусулманларни мумкинсиз таллашқа зорлимақта‏” сәрләвһилик бу мақалә бу йил 3‏-айда елан қилинип, зор ғулғула қозғиған. Мақалидә, хитай әмәлдарлириниң уйғур аилиләргә чошқа гөши тарқитип, уларни чошқа гөши йейишкә мәҗбурлаш арқилиқ уларниң диний етиқадиға хилаплиқ қиливатқанлиқи тәкитләнгән иди.

Филиппинда турушлуқ америка әлчиханисиниң роза һейт мунасивити билән елан қилған баянатида мундақ дейилгән: “биз һәр бириңларниң роза һейтини мубарәкләш билән биргә, бизниң көңлимизниң диний етиқади сәвәблик җазалашқа учраватқан хитайниң шинҗаң районидики мусулман аилиләрдә икәнликини қәйт қилимиз. Биз силәрниң америка вә униң иттипақдашлириниң мәзкур районда халиғанчә тутқун қилинған кишиләрни дәрһал қоюп бериш һәққидики чақириқиға аваз қошушиңларни үмид қилимиз”.

Нөвәттә, америка һөкүмити өзиниң хитайда турушлуқ әлчиханисиниң торида уйғурлар һәққидики мақалә, баянат вә учурларни елан қилипла қалмай, башқа дөләтләрдә турушлуқ америка әлчиханилириму бу хил учур вә мақалиләрни елан қилип, шу дөләтләрни ғәйрий мусулманларни яки мусулман җамаәтлирини уйғурларниң вәзийитигә көңүл бөлүшкә чақирип кәлди. Америка дөләт мудапиә министирлиқиниң илгири сүрүшичә, нөвәттә 3 милйондәк уйғур, қазақ вә башқа түркий мусулман хәлқләр хитайниң йиғивелиш лагерлирида тутуп турулмақтикән.