Amérikaning filippinda turushluq elchixanisi: "‏Uyghur tutqunlarni qoyup bérish chaqiriqigha qétilishinglarni ümid qilimiz"

Muxbirimiz erkin
2019-06-05
Élxet
Pikir
Share
Print

Amérikaning filippinda turushluq elchixanisi özining twétir hésabida bayanat élan qilip, filippinliqlarni amérika we uning ittipaqdashlirining xitay hökümiti teripidin tutqun qilin'ghan Uyghur musulmanlirini derhal qoyup bérish chaqiriqigha awaz qoshushushini ümid qilghan.

Amérika elchixanisi roza héytning harpa küni yeni 4‏-iyun küni élan qilghan bayanatida, amérika tashqi ishlar ministirliqining "Hembehr amérika" namliq resmiy torida élan qilin'ghan Uyghurlar heqqidiki maqalini köchürüp basqan. "Xitay da'iriliri musulmanlarni mumkinsiz tallashqa zorlimaqta‏" serlewhilik bu maqale bu yil 3‏-ayda élan qilinip, zor ghulghula qozghighan. Maqalide, xitay emeldarlirining Uyghur a'ililerge choshqa göshi tarqitip, ularni choshqa göshi yéyishke mejburlash arqiliq ularning diniy étiqadigha xilapliq qiliwatqanliqi tekitlen'gen idi.

Filippinda turushluq amérika elchixanisining roza héyt munasiwiti bilen élan qilghan bayanatida mundaq déyilgen: "Biz her biringlarning roza héytini mubareklesh bilen birge, bizning könglimizning diniy étiqadi seweblik jazalashqa uchrawatqan xitayning shinjang rayonidiki musulman a'ililerde ikenlikini qeyt qilimiz. Biz silerning amérika we uning ittipaqdashlirining mezkur rayonda xalighanche tutqun qilin'ghan kishilerni derhal qoyup bérish heqqidiki chaqiriqigha awaz qoshushinglarni ümid qilimiz".

Nöwette, amérika hökümiti özining xitayda turushluq elchixanisining torida Uyghurlar heqqidiki maqale, bayanat we uchurlarni élan qilipla qalmay, bashqa döletlerde turushluq amérika elchixanilirimu bu xil uchur we maqalilerni élan qilip, shu döletlerni gheyriy musulmanlarni yaki musulman jama'etlirini Uyghurlarning weziyitige köngül bölüshke chaqirip keldi. Amérika dölet mudapi'e ministirliqining ilgiri sürüshiche, nöwette 3 milyondek Uyghur, qazaq we bashqa türkiy musulman xelqler xitayning yighiwélish lagérlirida tutup turulmaqtiken.

Toluq bet