Firansiye prézidéntining Uyghurlar heqqide süküt qilishi tenqidlendi

• Muxbirimiz eziz
  2019-11-12

Ötken hepte firansiye prézidénti émmanul makron xitaydiki xizmet ziyaritige méngish aldida bir qisim teshkilatlar uning nöwette pütün dunya köz tikiwatqan Uyghurlar mesilisini xitay re'isi shi jinping bilen bolidighan söhbette otturigha qoyushini ümid qilghanidi. Emma ishlar kishiler ümid qilghandek bolmidi.

Pütkül söhbet jeryanida émmanul makron Uyghurlar mesilisi tügül, yéqinda “Saxarof mukapati” gha érishken türmidiki Uyghur ziyaliysi ilham toxti toghriliqmu bir éghiz söz qilmighan. “Kishilik hoquqni közitish teshkilati” 11-noyabir élan qilghan bu heqtiki obzorda éytilishiche, makron béyjinggha kélishtin burunla xitay terep uninggha bolghusi söhbet jeryanida xitayning “Ichki ishlirigha arilashqanliq” bolup qélish éhtimalliqi bolghan gep-sözlerni qilishtin saqlinishni uqturghan.

“Kishilik hoquqni közitish teshkilati” bu halni qattiq tenqidlep, firansiye hökümitining bu xil “Yumshaq diplomatiye” arqiliq xitay bilen dostane munasiwet ornitishining milyonlighan Uyghur lagérlargha qamalghan we ziyankeshlikke uchrawatqan bir weziyette otturigha chiqqanliqini alahide eskertti. Shundaqla “Makronning bu mesilide süküt qilishi shi jinpingning xorikini téximu östürüp, téximu köp zulumgha yol achidu” dédi.