Яш уйғур паалийәтчи фирқәт җәвдәт лондондики «томас ройтерс фонди җәмийити» ниң йиллиқ йиғиниға тәклип қилинған

Мухбиримиз ирадә
2019-11-14
Елхәт
Пикир
Share
Принт

Америкадики яш уйғур паалийәтчи фирқәт җәвдәт 14-ноябир күни әнгилийәдики нопузлуқ органлардин болған «томас ройтерс фонди җәмийити» ниң йилда бир қетим өткүзүлидиған йиғиниға тәклип қилинған.

Ройтерс агентлиқиниң хәвәр қилишичә, фирқәт җәвдәт «ишәнч муһакимә йиғини» дәп атилидиған бу сорунда уйғурларниң вәзийити үстидә сөзләйдикән. У ройтерс агентлиқиға қилған сөзидә «өзиниң әсли хитай һөкүмити тәрипидин лагерға қамалған аписиниң қоюветилиши үчүн паалийәтлиригә башлиған болса, бүгүнки күндә қизиниң келәчики үчүн бу давасини давам қиливатқанлиқини» тәкитлигән. У сөзидә уйғурларниң бешиға келиватқан бу күлпәтләрниң аяғлишидиғанлиқиға даир һечқандақ бир ишарәт көрмәйватқанлиқини тәкитләп: «йәниму көп лагерлар давамлиқ қурулуватиду. . . Мән буниң мениң апам биләнла түгимәйдиғанлиқини, униң хитайниң башқа җайлириғиму тарқилидиғанлиқини билимән. Мана бу сәвәбтин мән авазсизларниң авази болуш йолини таллидим,» дегән.

Фирқәт җәвдәт йәнә хитайда ишләп чиқирилип дуняға експорт қилиниватқан мәһсутларниң мутләқ көп қисминиң уйғур елидә йолға қоюлуватқан мәҗбурий әмгәккә мунасивәтлик икәнликиниму тәкитләп өткән.

Фирқәт җәвдәтниң ғулҗидики аниси башта лагерға елип кетилип, андин 7 йиллиқ кесилгәнлики мәлум болғаниди. Фирқәтниң тохтимай мәтбуатларға хитайниң униң аниси вә уйғурларға қаратқан зулумлирини аңлитип гуваһлиқ бериши вә америка ташқи ишлар министирлиқиниң бесими сәвәблик хитай даирилири униң анисини 3 ай илгири қоюп бәргән болсиму, лекин униң анисиниң йәнила қаттиқ назарәт астида икәнлики мәлум.

Пикирләр (0)
Share
Толуқ бәт