“Forbés zhurnili” xitayning iqtisadi ösüshi uning élan qilghinidin köp töwen ikenlikini bildürdi

Washin'gtondin muxbirimiz erkin teyyarlidi
2024.05.06

Amérikaning “Forbés zhurnili” xitayning 2022- we 2023-yilliridiki iqtisadi ösüshi uning élan qilghan sanliq melumatidin köp töwen ikenliki, shuningdek xelq'ara pul fondi teshkilati élan qilghan sanliq melumatning uningdin köp perqliq ikenlikini bildürgen.

Xitay hökümiti bu yilning bashlirida élan qilghan sanliq melumatida özlirining 2022-yilliq iqtisadi ösüshining 4.8 Pirsent, 2023-yilliq iqtisadi ösüshining 5.2 Pirsent bolghanliqini élan qilghan. Lékin “Forbés zhurnili” ning 4-may küni élan qilghan bu heqtiki bir maqaliside, xitay bash ministiri li chyang xitayning “Kowid yuqumini nölge chüshürüsh” qamilidin “Ongushluq ötkenliki” ni ilgiri sürgen bolsimu, biraq xitay iqtisadi duch kéliwatqan qiyinchiliqni chüshendürüshte bezi halqilarning ghayib bolghanliqini bildürgen. “Forbés zhurnili” ning maqaliside qeyt qilinishiche, xelq'ara fondi teshkilati xitay iqtisadining yéqinqi ikki yilliq ösüsh nisbiti heqqide perqliq melumatlarni bermekte iken.

“Forbés zhurnili” da élan qilin'ghan “Xitay iqtisadi duch kéliwatqan qiyinchiliqni chüshendürüshte ghayib bolghan halqilar” namliq maqalida éytilishiche xelq'ara pul fondi teshkilati xitayning 2022-yilliq iqtisadi ösüshini 0.72 Pirsent, 2023-yilliq iqtisadi ösüshini nöldin töwen 1.04 Pirsent, dep mölcherligen. “Forbés zhurnili” ning qeyt qilishiche, xelq'ara pul fondi teshkilatining yuqiriqi mölcheri xelq pulining bu mezgilde 12 pirsenttin 14 pirsentkiche qimmitini yoqatqanliqini hésabqa qatqan bolup, dunya bankisi, amérika fédératsiye ghezinisi qatarliq gherb pul-mu'amile organlirining mölcherimu xelq'ara pul fondi teshkilati bilen oxshash bolghan.

“Forbés zhurnili” ning bildürüshiche, gherb iqtisadshunasliri iqtisadning ösüshini hésablashta soda, qerz, pul kemchilliki, istémal telipi qatarliq nurghun amillarni hésabqa qatsimu, emma xitay iqtisadining arqigha chékinishide bashqilargha oxshimaydighan yene bir amil rol oynimaqta iken. “Forbés zhurnili” kowid-19 wirusi yuqumining tesiri hazirmu dawamlishiwatqanliqi, bu xitay iqtisadining chékinishini chüshendürüshtiki ghayib halqa ikenlikini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.