Fransiye emeldarliri: "Prézidént makron xongkong we Uyghur mesililirini tilgha élishtin chékinmeydu"

Muxbirimiz erkin
2019-11-04
Share

Fransiye emeldarliri nöwette xitayda ziyarertte boliwatqan fransiye prézidénti émanu'él makronning ziyaritide xongkong we Uyghur mesilisini öz ichige alghan kishilik hoquq mesililirini tilgha élishtin chékinmeydighanliqini bildürgen. Chet'el taratqulirining xewer qilishiche, fransiye prézidént sariyi makronning ziyariti heqqide bergen bayanatida, uning "Héchqandaq bir cheklimige uchrimighanliqi", "Öz ara hörmet we semimiyet asasida" xongkong we shinjang weziyiti, shundaqla tor hujumi qatarliq mesililerni öz ichige alghan nazuk kishilik hoquq mesililirini otturigha qoyidighanliqini bildürgen.

Prézidént makron noyabir küni shangxeyge yétip kelgen bolup, u bu yerde 2‏-nöwetlik xitay xelq'ara import körgezmisining échilish murasimigha qatnashqan. Makronning 5‏-noyabir küni béyjinggha yétip baridighanliqi ilgiri sürülmekte. Bu, uning fransiye prézidéntiliq textige olturghandin béri xitayni 2‏-qétim ziyaret qilishidur. Lékin, uning bu qétimliq ziyariti xitay hökümiti 2 milyondek Uyghurni yighiwélish lagérlirigha qamap, Uyghurlarning medeniyiti, diniy étiqadigha buzghunchiliq qilish, ularning insan heqlirini éghir depsende qilish bilen eyiblinip, fransiyeni öz ichige alghan gherb döletlirining xitaygha jiddiy tedbir qollinishi telep qiliniwatqan bir waqitta xitayni ziyaret qilghan.

Kishilik hoquq közitish teshkilatining fransiye shöbisi 1‏-noyabir küni uninggha ochuq xet élan qilip, uning ziyarette xitaydin Uyghur rayonidiki lagérlarni taqashni telep qilishni otturigha qoyghan. Ochuq xette: "Makronni shi jinpinggha ochuq‏-ashkare bésim ishlitip, shinjangdiki siyasi terbiyelesh lagérlirini taqashni, xalighanche tutqun qilin'ghan barliq kishilerni derhal qoyup bérishni, xongkong xelqining siyasi hoquqigha hörmet qilishini telep qilishqa chaqirimiz" déyilgenudi. Lékin, chet'el taratqulirining ilgiri sürüshiche, makronning bu qétimliq ziyaritining asasliq küntertipi fransiye we yawropaning iqtisadi we soda menpe'etini, shundaqla medeniyet muhitini qoghdash" iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet