2024-Yilliq G-7 döletliri bashliqlar yighini italiyede bashlan'ghan

2024-Yilliq “Sana'etleshken yette dölet bashliqliri yighini”, yeni G-7 döletliri bashliqlar yighini italiyening apuliya rayonida bashlan'ghan.

Mezkur yighin, rusiyening ukra'inagha qaratqan tajawuzchiliq urushi dawam qiliwatqan hemde yene xitay bilen amérika otturisidiki soghuqchiliq küchiyiwatqan bir mezgilde échilghan.

BBC Ning xewer qilishiche, 13-iyun küni bashlan'ghan bu yighin'gha amérika, kanada, gérmaniye, firansiye, italiye, en'gliye we yaponiye qatarliq 7 döletning bashliqliri hemde yawropa kéngishi bilen yawropa komitétining bashliqlirimu qatnashqan.

Xewerlerdin qarighanda, 13-iyun künidin 15-iyun künigiche 3 kün dawam qilidighan bu yighin jeryanida G-7 döletler rehberliri kilimat özgirishi, afriqaning tereqqiyati, isra'iliye-pelestin mesilisini asas qilghan ottura sherq mesilisi, rusiye-ukra'ina urushi, köchmenler mesilisi, asiya-tinch okyan we iqtisadiy bixeterlik mesilisi, sün'iy eqil we énérgiye qatarliq dunya küntertipige munasiwetlik mesililerde sözlishidighanliqi melum.

“El-jezire” téléwiziyesining xewiridin qarighanda, yighin jeryanidiki muhim témilarning biri xitay bolup, amérikaning gherbtiki ittipaqdashlirigha xitayning tökme qilip sétishtin ibaret nachar soda uslubigha ortaq taqabil turush mesiliside bésim ishlitidighanliqi mölcherlenmektiken. Bu qétimliq yighinda yene, G-7 we yawropa ittipaqi döletliri ukra'inagha 50 milyard dollar qerz pul bérish toghrisida kélishim élan qilghan.

Melum bolushiche, G-7 döletliri bashliqlar yighinining sahibxana döliti bolghan italiye bu nöwetlik yighin'gha yene, ukra'ina, hindistan, biraziliye, argéntina, türkiye, ereb birleshme xelipiliki, i'ordaniye, kéniye, aljiriye, tunis we mawritaniye qatarliq döletler rehberlirini hemde yene papa firansis qatarliqlarnimu teklip qilghan.