Xitaydiki gén ewrishikisi sinaqliri xitay armiyesi bilen chétishliq iken

Roytérs agéntliqining 6-séntebirdiki xewiride éytilishiche, bir qisim döletlerdiki tébbiy mu'esseseler we doxturlar özlirige gén ewrishkisini sétip bériwatqan xitaydiki bir chong shirketning xitay armiyesige chétishliq ikenlikini bilmeydighanliqini éytqan. Ular yéqin'ghiche ayallarning tughuttin ilgiriki tekshürüsh ishlirigha da'ir tetqiqat üchün kéreklik bolghan ayallar gén ewrishkisini xitayning shénjén shehiridiki “BGI Guruhi” din sétiwalghaniken. Bu shirket hazirgha qeder az dégendimu 52 dölette bu xil gén ewrishkilirini satqan bolup, bu ewrishkiler sekkiz milyondin köprek ayaldin yighilghan iken. Halbuki xelq'arada bu xildiki gén ewrishkilirini dölet halqighan shekilde sétish toghrisida qattiq belgilimiler chiqirilghan iken.

Roytérs agénliqining xewiride éytilishiche, 2021-yilining otturilirila “BGI Guruhi” temin etken nechche onlighan pen-tetqiqat türlirining emeliyette xitay xelq azadliq armiyesi bilen zich alaqisi barliqi melum bolghan. “BGI Guruhi” bolsa bu gén ewrishkilirini hamilidar ayallarning bedinidin toplighan iken. Emma ular özlirining xitay armiyesi bilen alaqisi barliqini qet'iy inkar qilghan hemde “Herbiy doxturxanilar bilen bolghan hemkarliq armiye bilen hemkarlashqanliqqa barawer emes” dep turuwalghan.

“BGI Guruhi” temin etken milyonlighan gén ewrishkiliri dunyaning herqaysi jayliridiki tejribixanilarda ishlitilidighan bolsimu, emma bu gén ewrishkiliri élin'ghan waqitta shexslerning buninggha ijazet bergen-bermigenliki éniq emes iken. Yene kélip 2021-yilining béshida amérika hökümiti “BGI Guruhi” toplighan ghayet zor miqdardiki bi'ologiyelik gén ewrishkilirining emeliyette xitay hökümiti dawam qilduruwatqan teqlidiy eqil we herbiy téxnika ishlirigha qollinilidighanliqini jakarlighan idi. Emdilikte bu bayanatning heqiqet ikenliki bir qedem ilgiriligen halda ispatlan'ghan.

Melum bolushiche, buningdin ilgirimu Uyghur diyaridiki milyonlighan Uyghur qiz-chokanlirining mejburiy yosunda hökümet teshkilligen “Heqsiz salametlik tekshürüsh” pa'aliyitige qatnashturulghanliqi melum bolghan idi. Bu jeryanda salametlik tekshürtken pütkül kishilerning gén ewrishkisining toplan'ghanliqi heqqide türlük uchurlar otturigha chiqqanidi.