Gérmaniye terep xitayning “Xu'ada gén guruhi” ning gén sanliq melumatlirini toplighanliqigha jiddiy inkas bildürgen

Gérmaniye xitaydiki “Xu'ada gén guruhi” (BGI) ning gén sanliq melumatlirini toplap, xitay herbiy da'irilirini teminligenlikige jiddiy qaraydighanliqini élan qilghan. Roytérs agéntliqining xewer qilishiche, nöwette gérmaniye sehiye ministirliqi bu mesilini alaqidar ministirliqlar we yawropa komissiyesi bilen muzakire qilmaqta iken.

Roytérs agéntliqi ötken hepte xu'ada shirkiti ishlepchiqirip dunyagha satqan hamildar ayallarni tughuttin burun tekshürüsh eswabini herbiyler bilen birliship ishlepchiqarghanliqi, bu shirketning milyonlighan ayallarni tekshürüshtin érishken DNA ewrishkisini herbiylerge bergenlikini bildürgen.

Roytérs agéntliqining bildürüshiche, xu'ada shirkiti bu mehsulatni ‍amérikadin bashqa yawropani öz ichige alghan dunyadiki 52 döletke satqan bolup, 8 milyon 400 ming ayalning DNA ewrishkisini toplighan iken. Amérika hökümiti 2020-yili 7-ayda bu shirketning “Shinjang yipek yoli-BGI” we “Béyjing lyuxé-BGI” namliq ‍ikki tarmaq shirkitini xitay hökümitining Uyghurlarni téximu ‍ilgirlep basturushta ishlitishi ‍üchün DNA analizi élip barghanliqi seweblik jazalighan idi.

Roytérs agéntliqining ‍ötken heptidiki xewiride éytilishiche, “Xu'ada gén guruhi” 2010-yildin béri herbiyler bilen az digende 12 qétim birliship tetqiqat élip barghan bolup, uning bir tetqiqat türi Uyghur we tibet ayallirigha chétishliq iken. Xewerde bu tetqiqat türining yuqiri itidarliq herbiy kompyutér bilen xitay ayalliridiki wirus we rohiy késelliklerni éniqlighanliqi, shundaqla bu tetqiqatning tibet hem Uyghur ayallirigha merkezliship, ularning irsiyet hem jismaniy alahidikiliridiki baghlinishni tekshürgenlikini bildürgen.