Gensuning wuwéy türmisige bir qanche ming Uyghurning qamalghanliqi ilgiri sürüldi

Muxbirimiz erkin
2019-04-05
Élxet
Pikir
Share
Print

Xitayning gensu ölkisi wuwéy shehiridiki bir türmide az dégende ming Uyghur tutqunning qamalghanliqi ilgiri sürüldi.

Italiyediki "Zimistan" namliq diniy erkinlik torining ashkarilishiche, bu türmidiki Uyghur tutqunlar 2018‏-yilning axirlirida élip kélin'gen. Bu del xitay hökümitining Uyghur rayonidin xitay ölkilirige qatnaydighan poyizlarni bir qanche ay toxtatqan mezgilide toghra kélidu.

Xitay hökümiti ötken yili 8‏-ayda ichkiri xitay ölkilirige poyiz béliti sétishni toxtatqanliqini, buning bir qanche ay dawamlishidighanliqini élan qilghan. Emma sewebini chüshendürmigen idi. Zimistan torining gensu wuwéydiki yerlik shahitlarning sözni neqil keltürüshiche, "2018‏-Yili qish peslining bir küni wuwéy shehiridiki türmige baridighan yol 2 kün taqiwétilip, aptomobil we piyadilerning méngishi cheklen'gen. 2‏-Küni yérim kéche sa'et 2 de qoralliq saqchilar 10 nechche aptobusta Uyghur rayonidin yötkep kélin'gen put-qoli kishenlik tutqunlarni wuwéy poyiz istansisidin türmige yötkigen. Neq meydanni öz közi bilen körgen bir shahit pütün yolning qamal qilin'ghanliqi, her bir aptobusni 3 saqchi aptomobili qoghdap mangghanliqi, her bir Uyghurni ikki saqchining yallap mangghan".

Zimistan torining xewiride bayan qilinishiche, Uyghur rayonidiki türmilerning tor sistémisi qurulushigha qatnashqan bir tor téxnik xadimi hökümet rayonda türmilerni keng kölemlik qurghan bolsimu, lékin yenila yétishmey gensugha toshighanliqini bildürgen. Shu jaydiki ehwaldin xewerdar biri "Zimistan" torining muxbirigha "Put-qoli zenjir bilen chétip qoyulidu. Uxlighandimu éliwetmeydu, 24 sa'et égilip turushi kérek. Gep anglimighanlar derhal bir terep qilinidu" dégen.

Yéqinda radiyomiz xitay hökümitining bir türküm Uyghur tutqunlirini gensu, chingxey, xéylongjyang, xubéy, sichüen, ichki mongghul, shenshi qatarliq ölkilerdiki türmilerge yötkigenlikini delilligen idi. Amérika hökümitining ilgiri sürüshiche, nöwette 800 mingdin 2 milyon'ghiche Uyghur, qazaq we bashqa musulman milletler yighiwélish lagérlirida tutup turulmaqta iken.

Toluq bet