Җорҗи сорос: “ши җинпиңниң диктаторлуқи хитайниң өзигә тәһдит”

Американиң әң чоң байлиридин бири, мәбләғ салғучи вә сахавәтчи җорҗи сорос йеқинда “вол-ситрет журнили” гезитидәмақалә елан қилип, хитай рәиси ши җинпиңни тәнқидлигән, уни “дуняниң хәтәрлик дүшмини, дең шиявпиңниң ислаһат йолини рәт қилип, хитайни балайи апәт йолиға башлиғучи” дегән.

Җорҗи соросниң қаришичә, хитай һөкүмдари ши җинпиң хитайни дәриҗидин ташқири дөләткә айландуридиғанлиқини җакарлиған болсиму, униң сияситидә еғир хаталиқ вә тәтүрлүк бар, һакимийитиниң ичкий қисмида зиддийәтләр бар, бу зиддийәтләр америка-хитай оттурисидики сүркилишләрдә оттуриға чиққан. У бу зиддийәтләрниң түп сәвәбини оттуриға қоюп мундақ дегән: “америка демократийәни, ечиветилгән җәмийәтни қоллайду, һөкүмәтниң роли шәхсий әркинликини қоғдаш; ши җипниң болса мав зедуңниң йолини тутуп, һоқуқ мәркәзләшкән бекинмә җәмийәтни бәрпа қилди, бундақ җәмийәттә шәхсниң әркинлики йоқ, барлиқ хитай пуқралири коммунист хитай һөкүмити үчүн хизмәт қилиду. Ши җинпиңниң мәқсити хитай пуқралирини полаттәк интизам билән техиму күчләндүрүп, риқабәттә үстүнлүк қазиниш”.

Җорҗи солос мундақ дәп язған: “америка билән хитай мунасивитиниң тездин яманлишип кетиши бәлким урушни кәлтүрүп чиқириши мумкин. Ши җинпиң кәлгүси 10 йилда тәйвәнни елишни пиланлиғанлиқини, буниң үчүн хитай армийәсини техиму күчәйтидиғанлиқини ениқ билдүрүп болди. У 2022-йил хитайниң өмүрлүк президенти болуп қалса, 10 йилда пүтүн һоқуқни қолға алалайдиғанлиқини җәзмләштүрүп болди. У өз пиланида нурғун дүшмәнлирини йоқатмақчи, уларни өзигә қарши чиқалмайдиған қилип қоймақчи. Мәнчә, ши җинпиң бүгүнки ечиветилгән дуняниң әң хәтәрлик дүшмини, барлиқ хитай пуқралириму униң зиянкәшликигә учриғучилири, болупму хитайдики сиясий өктичиләр, диний етиқадчилар вә аз санлиқ милләтләр еғир зиянкәшликкә учриди”.

Униң қаришичә, ши җинпиң 2022-йилдин кейин давамлиқ һакимийәт бешида турса техиму хәтәрлик диктаторға айлиниду, қол астидики әмәлдарлирини қорқутуп һәм алдап, уларни мутләқ бойсундуриду; хитай  пуқралирини қаттиқ түзүм билән башқуруп, уларни хитай компартийәсиниң садиқ қуллириға айландуриду; дуня хоҗа болуш чүшини әмәлгә ашуруш үчүн өктәм, зораван, бимәнә сиясәт йүргүзиду.  Ақивәттә, хитай дөлитигә вә дуняға балайи апәт елип келиду.