Jorji soros: “Shi jinpingning diktatorluqi xitayning özige tehdit”

• Ixtiyariy muxbirimiz jewlan
  2021-08-16

Amérikaning eng chong bayliridin biri, meblegh salghuchi we saxawetchi jorji soros yéqinda “Wol-sitrét zhurnili” gézitidemaqale élan qilip, xitay re'isi shi jinpingni tenqidligen, uni “Dunyaning xeterlik düshmini, déng shiyawpingning islahat yolini ret qilip, xitayni balayi apet yoligha bashlighuchi” dégen.

Jorji sorosning qarishiche, xitay hökümdari shi jinping xitayni derijidin tashqiri döletke aylanduridighanliqini jakarlighan bolsimu, uning siyasitide éghir xataliq we tetürlük bar, hakimiyitining ichkiy qismida ziddiyetler bar, bu ziddiyetler amérika-xitay otturisidiki sürkilishlerde otturigha chiqqan. U bu ziddiyetlerning tüp sewebini otturigha qoyup mundaq dégen: “Amérika démokratiyeni, échiwétilgen jem'iyetni qollaydu, hökümetning roli shexsiy erkinlikini qoghdash؛ shi jipning bolsa maw zédungning yolini tutup, hoquq merkezleshken békinme jem'iyetni berpa qildi, bundaq jem'iyette shexsning erkinliki yoq, barliq xitay puqraliri kommunist xitay hökümiti üchün xizmet qilidu. Shi jinpingning meqsiti xitay puqralirini polattek intizam bilen téximu küchlendürüp, riqabette üstünlük qazinish”.

Jorji solos mundaq dep yazghan: “Amérika bilen xitay munasiwitining tézdin yamanliship kétishi belkim urushni keltürüp chiqirishi mumkin. Shi jinping kelgüsi 10 yilda teywenni élishni pilanlighanliqini, buning üchün xitay armiyesini téximu kücheytidighanliqini éniq bildürüp boldi. U 2022-yil xitayning ömürlük prézidénti bolup qalsa, 10 yilda pütün hoquqni qolgha alalaydighanliqini jezmleshtürüp boldi. U öz pilanida nurghun düshmenlirini yoqatmaqchi, ularni özige qarshi chiqalmaydighan qilip qoymaqchi. Menche, shi jinping bügünki échiwétilgen dunyaning eng xeterlik düshmini, barliq xitay puqralirimu uning ziyankeshlikige uchrighuchiliri, bolupmu xitaydiki siyasiy öktichiler, diniy étiqadchilar we az sanliq milletler éghir ziyankeshlikke uchridi”.

Uning qarishiche, shi jinping 2022-yildin kéyin dawamliq hakimiyet béshida tursa téximu xeterlik diktatorgha aylinidu, qol astidiki emeldarlirini qorqutup hem aldap, ularni mutleq boysunduridu؛ xitay  puqralirini qattiq tüzüm bilen bashqurup, ularni xitay kompartiyesining sadiq qullirigha aylanduridu؛ dunya xoja bolush chüshini emelge ashurush üchün öktem, zorawan, bimene siyaset yürgüzidu.  Aqiwette, xitay dölitige we dunyagha balayi apet élip kélidu.