Gérmaniye bash ministiri sholtz xitayni rusiyege qoral bérish we uning “Aqiwiti” toghrisida agahlandurdi

Gérmaniye bash ministiri olaf sholtz, xitayni agahlandurup, eger xitay rusiyening ukra'ina urushi üchün moskwani qoral bilen teminlise, buning “Aqiwiti” yaman bolidighanliqini bildürgen. Olaf sholtz, amérika we en'giliyedin kéyin xitayni rusiyening ukra'ina urushi üchün moskwani qoral bilen teminlimeslik, eger teminlise buning “Éghir aqiwiti” bolidighanliqi toghrisida agahlandurghan gherb döletlirining biri boldi. Lékin laf sholtzning éytishiche, u béyjingning rusiyeni qoral bilen teminleshtin özini qachuridighanliqigha ümidwar qaraydiken. Olaf sholtz bu sözlerni 5-mart yekshenbe küni amérika simliq xewerler tori CNN de élan qilin'ghan söhbette éytqan.

Birleshme agéntliqining bildürüshiche, olaf sholtz xitaygha qaritilghan bu agahlandurushni amérika prézidénti jow baydén bilen washin'gtonda körüshüp ikki kündin kéyin élan qilghan. Sholtz prézidént baydén bilen 2-mart küni aqsarayda ötküzgen axbarat yighinida, gherb ittipaqdashlirining ukra'inani “Urush qanchiliq dawamlashsa dawamlashsun”, qet'iy qollaydighanliqini éytqan. Lékin axbarat yighinida her ikki terep xitayni tilgha almighan idi.

Birleshme agéntliqining bildürüshiche, olaf sholtz 5-mart CNN de, eger xitay rusiyege yardem qilsa, qandaq jazagha uchraydighanliqi heqqidiki bir su'algha mundaq digen: “Méningche, buning aqiwiti bolidu, lékin biz hazir bu ishning yüz bermeslikini éniq otturigha qoyush basquchida turuwatimiz, men bu mesilide bizning telipimizning muweppeqiyetlik bolidighanliqigha nisbeten ‍ümidwar qaraymen. Emma biz choqum diqqet qilishimiz we nahayiti étiyatchan bolushimiz kérek.”

Halbuki, olaf sholtz xitayning rusiyege qoral yardem qilsa qandaq aqiwetke uchraydighanliqi we némilerdin qattiq éhtiyatchan bolushi kéreklikini tilgha almighan. Gérmaniye yawropa ittipaqining eng chong iqtisadiy gewdisi bolup, xitay uning eng chong soda shérikidur.