Gérmaniye tashqiy ishlar ministiri xitaydiki ziyaritini “Kishini chöchütidu” dep teswirligen

Gérmaniye tashqi ishlar ministiri annalina bayérbok 19-april küni qilghan sözide özining xitaydiki sepirining bir qismini “Kishini chöchütidighan derijide” dep teswirligen. U, béyjingning bir soda hemrahi yaki riqabetchi bolushtin halqip, gérmaniyening sistémiliq reqibige ayliniwatqanliqini éytqan.

Roytérs agéntliqining bildürüshiche, annalina ba'érbok bu sözlerni gérmaniye töwen palatasida xitaydiki sepiri heqqide qilghan xulase sözide éytqan. U, xitayning xelq'ara qa'idilerni asas qilghan dunyawiy tertipni bir chetke qayrip qoyup, özining bilgini boyiche heriket qilmaqchi boluwatqanliqini bildürgen.

Xewerde déyilishiche, xitay gérmaniyedin xitayning teywenni xitay qoynigha élip kirish arzusini qollishini telep qilghan. Xitay yene gérmaniye bilen xitayning öz'ara düshmen emes, belki shérik döletler ikenlikini ilgiri sürgen iken. Annalina xanim töwen palatadiki sözide, xitayning bezi teleplirining “Heqiqeten heyran qalarliq ikenlikini” tilgha alghan bolsimu, emma buning tepsilati heqqide toxtalmighan.

Bayérbok xanim mundaq dégen: “Xitay gérmaniyening eng chong soda hemrahi, emma bu béyjingning gérmaniyening eng muhim soda hemrahi ikenlikidin dérek bermeydu. Gérmaniye hökümiti xitay bilen hemkarlishishni xalaydu, emma gérmaniye özining ilgiriki ‛soda arqiliq özgertish‚ uqumidin ibaret xataliqni qayta tekrarlashni xalimaydu.”

Bayérbok xanim yene xitayning dunyaning tinchliqi üchün tirishish mejburiyiti barliqini, bolupmu ukra'inadiki urushta rusiyediki tesiridin paydilinishi lazimliqini éytqan.

Annalina bayérbok xanim aldinqi hepte xitayda 3 künlük resmiy ziyarette bolghan we bu jeryanda xitay tashqiy ishlar ministiri chén gang, xitayning mu'awin bash ministiri xen jing, tashqiy ishlargha mes'ul xitay dölet komissari we xitay kompartiyesi merkiziy komitéti tashqiy ishlar ishxanisining mudiri wang yi qatarliqlar bilen körüshken. U bu qétimliq xitay ziyariti jeryanida teywen mesilisi we Uyghurlarning kishilik hoquqi mesilisde xitayni keskin sözler bilen agahlandurghan.