Һакимийәт бешиға келиши мөлчәрлиниватқан йешиллар партийәси германийәниң хитай сияситини өзгәртиши мумкин, дәп қаралмақта

Мухбиримиз ирадә
2021-08-12
Share

Германийәдә бу йил күздә елип берилидиған чоң сайламда қурулғуси бирләшмә һөкүмәтниң муһим бир қисми болуши мумкин, дәп қариливатқан йешиллар партийәси германийәниң хитай вә росийәгә қаратқан позитсийәсини қаттиқлаштуридиғанлиқи мөлчәрләнмәктә.

"вол-ситрт жорнили" гезитиниң хәвиригә қариғанда, германийәдә елип берилған рай синашта йешиллар партийәси хели зор авазға еришкән болуп, уларниң қурулғуси бирләшмә һөкүмәт тәркибигә кириш еһтималлиқи зор икән. Әгәр шундақ болса, бу йешиллар партийәсиниң 2005-йилидин кейин тунҗи қетим германийәдә һакимийәт үстигә келиши болуп қалидикән.

Йешиллар партийәсиниң явропа иттипақиниң сиясәт, иқтисад вә ташқий сиясәтлиригә зор тәсир көрситидиғанлиқи, германийәниң хитай вә росийәгә қаратқан позитсийәсини қаттиқлаштуридиғанлиқи, шундақла америкаға йеқинлишиши пәрәз қилинмақтикән.

Хәвәрдә мундақ дейилгән: "хитай германийәниң әң чоң сода һәмраһи вә нурғунлиған санаәт ширкәтлириниң муһим базири болуп, йешиллар партийәси меркел ханимниң сиясәтлиригә җәң елан қилмақта. Он йилға йеқин вақит ичидә, меркел ханим бейҗиң билән яхши мунасивәт орнатти. Өткән йили у явропа иттипақи-хитай мәбләғ селиш келишимигә американиң қаршилиқиға қаримай васитичилик қилди."

Явропа иттипақиниң йешиллар партийәсидин болған парламент әзаси рейнхард бутикофер сөзидә "партийимиз германийә санаитини хитайниң експортиға тайинишни азайтишқа илһамландуриду. Йешиллар партийәси бейҗиңға тақабил туруш, дөләт ичидики кәсипләрни қоллаш вә хитайниң адаләтсиз сода риқабити қатарлиқларға қарши туруш үчүн явропа иттипақидики шериклири билән йеқин мунасивәт орнитиду," дегән.

Германийәдики йешиллар партийәси уйғурлар мәсилисини йеқиндин билидиған вә қоллап кәлгән партийә болуп, техи йеқинда ешиллар партийәсиниң министер намзати анналена ханим өз нутуқлирида уйғурлар мәсилисини көп қетим тилға елип, хитайни җазалашни тәләп қилған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт