Hakimiyet béshigha kélishi mölcherliniwatqan yéshillar partiyesi gérmaniyening xitay siyasitini özgertishi mumkin, dep qaralmaqta

Muxbirimiz irade
2021-08-12
Share

Gérmaniyede bu yil küzde élip bérilidighan chong saylamda qurulghusi birleshme hökümetning muhim bir qismi bolushi mumkin, dep qariliwatqan yéshillar partiyesi gérmaniyening xitay we rosiyege qaratqan pozitsiyesini qattiqlashturidighanliqi mölcherlenmekte.

"Wol-sitrt zhornili" gézitining xewirige qarighanda, gérmaniyede élip bérilghan ray sinashta yéshillar partiyesi xéli zor awazgha érishken bolup, ularning qurulghusi birleshme hökümet terkibige kirish éhtimalliqi zor iken. Eger shundaq bolsa, bu yéshillar partiyesining 2005-yilidin kéyin tunji qétim gérmaniyede hakimiyet üstige kélishi bolup qalidiken.

Yéshillar partiyesining yawropa ittipaqining siyaset, iqtisad we tashqiy siyasetlirige zor tesir körsitidighanliqi, gérmaniyening xitay we rosiyege qaratqan pozitsiyesini qattiqlashturidighanliqi, shundaqla amérikagha yéqinlishishi perez qilinmaqtiken.

Xewerde mundaq déyilgen: "Xitay gérmaniyening eng chong soda hemrahi we nurghunlighan sana'et shirketlirining muhim baziri bolup, yéshillar partiyesi mérkél xanimning siyasetlirige jeng élan qilmaqta. On yilgha yéqin waqit ichide, mérkél xanim béyjing bilen yaxshi munasiwet ornatti. Ötken yili u yawropa ittipaqi-xitay meblegh sélish kélishimige amérikaning qarshiliqigha qarimay wasitichilik qildi."

Yawropa ittipaqining yéshillar partiyesidin bolghan parlamént ezasi réynxard butikofér sözide "Partiyimiz gérmaniye sana'itini xitayning éksportigha tayinishni azaytishqa ilhamlanduridu. Yéshillar partiyesi béyjinggha taqabil turush, dölet ichidiki kesiplerni qollash we xitayning adaletsiz soda riqabiti qatarliqlargha qarshi turush üchün yawropa ittipaqidiki shérikliri bilen yéqin munasiwet ornitidu," dégen.

Gérmaniyediki yéshillar partiyesi Uyghurlar mesilisini yéqindin bilidighan we qollap kelgen partiye bolup, téxi yéqinda éshillar partiyesining ministér namzati annaléna xanim öz nutuqlirida Uyghurlar mesilisini köp qétim tilgha élip, xitayni jazalashni telep qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet