Gérmaniye-xitay munasiwitidiki “Yériq” lar köplep ashkarilanmaqta

Washin'gtondin muxbirimiz eziz teyyarlidi
2023.06.20

“Birleshme agéntliq” ning 20-iyundiki xewiride éytilishiche, xizmet ziyariti üchün tunji qétim chet'elge chiqqan xitay bash ministiri li chyang shu küni bérlin shehiride gérmaniye rehbiri olaf shultz (Olaf Scholz) bilen körüshken. Bu qétimliq uchrishishning amérika tashqi ishlar ministiri antoni bilinkén béyjingda xitay re'isi shi jinping bilen uchrashqanning etisige toghra kélishi her sahening diqqitini qozghighan.

Li chyangning ziyariti bashlinishtin ilgirila “Gérmaniye dolqunliri” bu heqte obzor élan qilip, ikki terep otturisidiki söhbetlerning izchil shériklik munasiwitini rawajlandurush üchün bolup kelgenlikini, emma bu qétimqi ziyaretning xaraktéri nöwettiki weziyet tüpeylidin bashqichirek bolushi mumkinlikini algha sürgen.

Xewerde éytilishiche, bu qétim gérmaniye rehberliri xitay bash ministiri li chyang bilen sözlishidighan mesililer, jümlidin xitayning rusiye bilen dostluq munasiwiti, teywen boghuzidiki jiddiylik we Uyghur diyaridiki zulumlar ikki terep munasiwitide bezi “Yériq” larni peyda qilidighan amillar hésablinidiken. Bolupmu xitayning ukra'ina urushi mesiliside rusiyeni aktipliq bilen qollishi gérmaniye teweside zor bir naraziliqqa zémin hazirlawatqan bolup, bérlin shehiridiki mérkator institutining tetqiqatchisi barbara pon'gratz (Barbara Pongratz) “Hazir gérmaniye hökümiti xitay bilen bolidighan soda alaqisige chek qoyushni jiddiy oylashmaqta” dégen.

“El jezire”ning bu heqtiki xewiride éytilishiche, gérmaniye hökümiti téxi hazirghiche özlirining xitay heqqidiki siyasetlirini élan qilmighan. Emma ularning resmiy hökümet höjjetliride xitayni “Shérik”, “Riqabetchi” yaki “Istratégiyelik reqib” dep atash omumlishiwatqan bolup, nöwette xitayni “Istratégiyelik reqib” dep tonush köp salmaqni igileshni bashlighan. Nöwette xitay izchil türde gérmaniyening eng chong soda shériki bolup, 2022-yili ikki terepning soda miqdari 300 milyard yawro (320 milyard amérika dolliri) din ashqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.