Германийә-хитай мунасивитидә йеңи сүркилишләр көрүлмәктә

“җәнубий хитай әтигәнлик гезити” ниң 19-сентәбирдики хәвиридә ейтилишичә, хитай һөкүмити германийәниң бейҗиңдики баш әлчиси патрисия флор (Patricia Flor) ни чақиртип, германийә ташқи ишлар министири анналена бербок (Annalena Baerbock) ниң хитай рәиси ши җинпиңни “диктатор” дәп атиғанлиқиға наразилиқ билдүргән.

Хәвәрдә ейтилишичә, германийә ташқи ишлар министири анналена ханим америка зиярити җәрянида “фокс хәвәрлири” ниң зияритини қобул қилған һәмдә ши җинпиңни “диктатор” дәп атиған. У шу вақитта украина уруши һәққидә сөз қилип, “бу урушта украина йеңиши керәк. Чүнки диктаторлар әмәс, бәлки әркинлик вә демократийә ғәлибә саһиби болуши лазим” дегән.

Хитай һөкүмитиниң уйғур дияридики қирғинчилиқ қилмиши ташқи дуняға көпләп мәлум болғандин кейин, америка башчилиқидики бир қисим ғәрб дөләтлири ғәрб дунясини хитай билән болған иқтисадий алақә ишлирида ойлишип иш көрүшкә дәвәт қилип келиватқанлиқи мәлум. Әмма германийә бу җәһәттә әң пассип орунда туруп келиватқан болуп, уларниң хитай билән болған ғайәт зор қиммәттики сода мунасивити, җүмлидин германийә аптомобил санаитиниң әң чоң базири хитай болуштәк реаллиқ буниңдики асаслиқ тосқунлуқ, дәп қарилип кәлгән. Шундақла уларниң изчил хитай билән қоюқ достлуқ алақисини сақлап келишидики муһим сәвәбләрдин болуп қалған.

Дәрвәқә, чәт әл сиясийонлириниң ши җинпиңни “диктатор” дәп атиши көп қетим мәлум болған һадисидур. Америка пирезиденти җов байденму ши җинпиңни “диктатор” дәп атиған, әмма буниңлиқ билән икки тәрәп мунасивитиниң бузулуп кәтмәйдиғанлиқиниму әскәрткән иди.