Gérmaniye-xitay munasiwitide yéngi sürkilishler körülmekte

Washin'gtondin muxbirimiz eziz teyyarlidi
2023.09.19

“Jenubiy xitay etigenlik géziti” ning 19-séntebirdiki xewiride éytilishiche, xitay hökümiti gérmaniyening béyjingdiki bash elchisi patrisiya flor (Patricia Flor) ni chaqirtip, gérmaniye tashqi ishlar ministiri annaléna bérbok (Annalena Baerbock) ning xitay re'isi shi jinpingni “Diktator” dep atighanliqigha naraziliq bildürgen.

Xewerde éytilishiche, gérmaniye tashqi ishlar ministiri annaléna xanim amérika ziyariti jeryanida “Foks xewerliri” ning ziyaritini qobul qilghan hemde shi jinpingni “Diktator” dep atighan. U shu waqitta ukra'ina urushi heqqide söz qilip, “Bu urushta ukra'ina yéngishi kérek. Chünki diktatorlar emes, belki erkinlik we démokratiye ghelibe sahibi bolushi lazim” dégen.

Xitay hökümitining Uyghur diyaridiki qirghinchiliq qilmishi tashqi dunyagha köplep melum bolghandin kéyin, amérika bashchiliqidiki bir qisim gherb döletliri gherb dunyasini xitay bilen bolghan iqtisadiy alaqe ishlirida oyliship ish körüshke dewet qilip kéliwatqanliqi melum. Emma gérmaniye bu jehette eng passip orunda turup kéliwatqan bolup, ularning xitay bilen bolghan ghayet zor qimmettiki soda munasiwiti, jümlidin gérmaniye aptomobil sana'itining eng chong baziri xitay bolushtek ré'alliq buningdiki asasliq tosqunluq, dep qarilip kelgen. Shundaqla ularning izchil xitay bilen qoyuq dostluq alaqisini saqlap kélishidiki muhim seweblerdin bolup qalghan.

Derweqe, chet el siyasiyonlirining shi jinpingni “Diktator” dep atishi köp qétim melum bolghan hadisidur. Amérika pirézidénti jow baydénmu shi jinpingni “Diktator” dep atighan, emma buningliq bilen ikki terep munasiwitining buzulup ketmeydighanliqinimu eskertken idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.