Хитай, уйғурларни қоллиған германийә йешиллар партийәси парламент әзасиға виза беришни рәт қилған

Мухбиримиз әркин
2019-08-05
Елхәт
Пикир
Share
Принт

Хитай һөкүмити германийә йешиллар партийәси рәһбири, германийә парламент әзаси маргарет бауз ханимға виза беришни рәт қилған. Германийә таратқулириниң хәвәр қилишичә, хитайниң маргарет бауз ханимға виза беришни рәт қилишиға униң уйғурларни изчил қоллиши сәвәб болған.

Әсли германийә парламентиниң диҗитал комитети бу айниң ахирлирида хитайни зиярәт қилип, хитайниң шаңхәй, бейҗиң қатарлиқ шәһәрлиридә тәкшүрүш елип бармақчи иди. «Германийә долқунлири» радиосиниң хәвәр қилишичә, маргарет бауз ханим диҗитал комитетиниң әзаси болуп, бу зиярәт хитайниң униңға виза беришни рәт қилиши сәвәблик әмәлгә ашмаслиқ хәвпигә дуч кәлгән.

Маргарет бауз ханим өткән йили 11‏-айда германийә парламентида уйғурларниң кишилик һоқуқ мәсилисини оттуриға қоюп, қаттиқ муназирә қозғиған. У, бир милйондин артуқ уйғурниң қамалғанлиқи, бастурушқа вә тән җазасиға учраватқанлиқи, шундақла уйғур мәдәнийитиниң йоқитишқа учраватқанлиқини тәкитлигәниди. 

Маргарет бауз ханимниң «германийә долқунлири» радиосиға билдүрүшичә, у германийә парламентида сөзләштин бир күн аввал хитайниң германийәдә турушлуқ әлчиханиси униң ишханисиға телефон қилип, униң уйғур мәсилисини парламентта оттуриға қоймаслиқини тәләп қилғаникән. У, хитай тәрәп өзигә немә үчүн виза бәрмигәнликини чүшәндүрмигән болсиму, лекин буниңға өзиниң уйғур кишилик һоқуқ мәсилисигә көңүл бөлүши сәвәб болди, дәп қарайдиғанлиқини тәкитлигән. «Германийә долқунлири» ниң хәвиридә қәйт қилинишичә, хитай, германийә парламентиниң диҗитал комитетиға виза беришни рәт қилипла қалмай, униң кишилик һоқуқ комитетиғиму виза беришни рәт қилған. Мәзкур комитетниң бу йил 9‏-айда бейҗиң, тибәт вә уйғур районлирида зиярәттә болуш пилани бар иди.

Пикирләр (0)
Share
Толуқ бәт