Gérmaniyediki kishilik hoquq teshkilati chén chüen'go qatarliqlarning yawropagha kirishini chekleshni telep qildi

Muxbirimiz erkin
2019-12-06
Élxet
Pikir
Share
Print

"Xeter astidiki xelqler jem'iyiti" namliq gérmaniye kishilik hoquq teshkilati bayanat élan qilip, yawropa ittipaqini xitayning "Shinjang höjjetliri" ge inkas qayturushqa, chén chüen'go, ju xeylün, wang jünjéng qatarliq xitay emeldarlirining yawropagha kirishini chekleshke chaqirghan. Mezkur teshkilatning yéqinda élan qilghan bayanatida tekitlinishiche, yawropa ittipaqi yuqiriqi xitay emeldarlirigha sayahet cheklimisi we maliye imbargosi qoyushi kérek iken.

Bayanatta, Uyghur aptonom rayonluq partkom sékrétari chén chüen'go, shundaqla siyasi qanun komitétining sabiq sékrétari ju xeylun, uning ornini basqan wang jünjéng qatarliqlarning yawropagha kirishige yol qoymasliq telep qilinip, bu shexslerning Uyghur aptonom rayonidiki musulmanlarni basturushta zor jawabkarliqi barliqi bildürülgen. Bayanatta tekitlinishiche, eger yawropa ittipaqi kishilik hoquqni xorlighuchilarning qilmishini sürüshtürüshte jiddi bolsa, xitayning "Shinjang höjjetliri" ge jiddiy mu'amile qilishi kérek iken.

Mezkur bayanat yawropa komissiyesining yéngi re'isi, sabiq gérmaniye dölet mudapi'e ministiri ursula fon dér léyén yawropa komissiyesining re'isilik wezipisige olturushning harpisida élan qilin'ghan. Ursula fon dér léyén ilgiri xitaygha qarita qattiq qol bolidighanliqining bisharitini bergen. U "Xitayning tehditige sel qaralghanliqi" ni bildürgenidi. "Tehdit astidiki xelqler jem'iyiti" bayanatida, jü xeylunning Uyghur rayonida lagér sistémisini ijad qilip, bir yérim milyon Uyghur, qazaq, qirghiz we tungganlarni tutqun qilghanliqi, nöwette uning siyasitini wang jünjéngning ijra qiliwatqanliqi, chén chüen'goning yüzminglighan xitay kadirini Uyghur a'ililirige orunlashturup, ularni nazaret qiliwatqanliqi, uning yene Uyghur, qazaq we qirghizlarni omumyüzlük térrorluq bilen eyiblep, ularning medeniyiti we diniy étiqadini weyran qilishqa kirishkenlikini bildürgen.

Toluq bet