Wolkéswagén gérmaniye tashqi ishlar ministirining xitay ziyaritide Uyghur mesilisini tilgha almasliqini telep qilghan

Muxbirimiz erkin
2019-03-11
Élxet
Pikir
Share
Print

Gérmaniye aptomobil shirkiti wolkéswagénning gérmaniye tashqi ishlar ministiri xéyko ma'asning xitay ziyaritide xitayning musulmanlarni yighiwélish lagéri we uning "Shinjanggha alaqidar mesililer" ni tilgha almasliqini telep qilghanliqi ilgiri sürüldi. Mezkur weqe xongkongda chiqidighan "Xongkong erkin axbarati" namliq tor zhurnilida 11‏-mart küni élan qilin'ghan bir maqalide tilgha élin'ghan.

Xéyko ma'as 2018‏-yili 11‏-ayda xitayni ziyaret qilip, xitayning mu'awin re'isi wang chishen, mu'awin bash ministiri lyu xé, tashqi ishlar ministiri wang yi qatarliqlar bilen körüshken.

Eyni chaghda kishilik hoquq teshkilatliri uning xitay bilen lagérlar mesilisini sözlishishini telep qilghan idi. Lékin "Xongkong erkin axbarati" toridiki "Wolkéswagén xitayda: gérmanlar yene jaza lagérliridin xewirimiz yoqti, demdu?" serlewhilik maqalide qeyt qilinishiche, ishenchlik ikki xewer menbesi wolkéswagénning yuqiri derijilik xadimlirining xéyko ma'asqa lagérlar we Uyghur mesilisini tilgha almasliq heqqide xizmet ishligenlikini delilligen.

Maqalide, wolkéswagén shirkitining mezkur mesilide xéyko ma'asqa xizmet ishligenlikini inkarmu qilmighanliqi, étirapmu qilmighanliqi bildürülgen. Maqalide yene gérmaniye tashqi ishlar ministirliqining mezkur mesile heqqidiki so'algha qayturghan qisqa jawabida, ministir ma'asning bundaq bésimlargha téz pükmeydighanliqini bildürgenliki tekitlen'gen. Maqalide ilgiri sürülüshiche, xéyko ma'as eyni chaghda lagérlar mesilisini otturigha qoyghan. Lékin wang yi uninggha bundaq "Ösek sözler" ge ishenmeslikni éytqan.

Maqalide éytilishiche, aptor aléksandér zagérman xitayning changchün shehiridiki wolkéswagén aptomobil zawutida ishleydighan munire isimlik bu tunggan qizni ziyaret qilghan. Munazire xitay da'irilirining bu zawuttiki pütün Uyghur xizmetdashlirini qayturup ketkenliki, özining dadisi tunggan bolghanliqi üchünla qélip qalghanliqini bildürgen.

Toluq bet