Xitay mutexessisi ottura sherqtiki “Ghazatchi Uyghurlar” ning qaytip kélishidin endishe qilidighanliqini bildürdi

Xitay ijtima'iy penler akadémiye chégra tetqiqat institutining bashliqi shing gu'angchéng, xitayning ottura sherqtiki “Ghazatchi Uyghurlar” din endishe qilidighanliqini bildürgen. Shing gu'angchéng, “Shinjang medeniyet almashturush wekiller ömiki” namidiki mutexessisler guruppisining terkibide awstraliyege kelgen.

U bu sözlerni mezkur guruppining charshenbe küni sédniy shehiride awstraliye xelq'ara mesililer instituti bilen ötküzgen söhbet yighinida tekitligen.

Uning ilgiri sürüshiche, xitay hökümiti radikal Uyghur yashlirining ottura sherqqe bérip herbiy telim - terbiye élishidin we qaytip kélip xitayning bixeterlikige tehdit sélishidin endishe qilidiken.

Mezkur guruppining awstraliyeni ziyaret qilishidiki muddi'asi awstraliyege Uyghurlarning “Térrorluq” tehdit ikenlikini chüshendürüshmu, yaki bixeterlik mesililiride öz - ara pikir almashturushmu bunisi namelum.

Xitay hökümiti sherqiy jenubi asiya arqiliq türkiyege qachqan Uyghur musapirlirini ottura sherqtiki “Ghazatchi guruhlar” gha baghlap kelgen. Emma kishilik hoquq teshkilatlirining ilgiri sürüshiche, bu Uyghurlar xitayning diniy we medeniyet jehettiki bésimidin qachqan musapirlar.

Gu'angchéng awstraliye xelq'ara mesililer institutida xitay hökümiti Uyghurlarning islam dölitige qatnishishigha taqabil turush üchün rayondiki döletler bilen hemkarliqni kücheytiwatqanliqini bildürgen, emma u qandaq amil Uyghurlarni chet'elge qéchishqa mejburlawatqanliqini tilgha almighan.