Gherb dunyasining barghanche töwenlewatqan mehsulat éhtiyaji xitayning iqtisadigha zerbe bolmaqta

Washin'gtondin muxbirimiz eziz teyyarlidi
2023.12.20

“Yaponiye iqtisad xewerliri” (Nikkei) ning 19-dékabirdiki xewiride éytilishiche, nöwette xitay iqtisadi duch kéliwatqan eng chong zerbilerning biri, gherb dunyasining xitaydin mal zakaz qilish miqdarining aziyip kétishige mas halda otturigha chiqmaqta iken. Bolupmu xitaydiki herqaysi top tarqitish merkezliri üchün eng chong soda pursiti boluwatqan milad bayrimi harpisidiki aylarda körülidighan mal toxtami dolqunining bayram kelmestinla peskoygha chüshüp bolghanliqi, buning eng janliq delili bolup qalghan.

Xewerde éytilishiche, xitay hökümiti tajisiman wirusi sewebidin ijra qilinishqa bashlighan qattiq kontrolluq charilirini boshatqan, bolupmu 2023-yilining bashliridin tartipla chégra kontrolluqini zor derijide bikar qilghan bolsimu, emma gherb dunyasidiki soda sahesining xitay tewesidiki zawutlargha mal zakaz qilish miqdari barghanséri töwenlep mangghan. Bu hal milad bayrimi we yéngi yil bayrimi üchün mal zakaz qilishta eng gewdilik eks etken. Xitayning eksiche bashqa asiya döletlirining gherb dunyasi bilen bolghan mal toxtami barghanche köpiyishke bashlighan. Yiwudiki merkiziy soda sariyida dukan achidighan jyang famililik bir xitay bu heqte söz qilip, “Bu yil sodimizning héch tayini bolmidi. Hélimu teliyimizge rusiye we ottura sherq bolup qaptiken. Hazir mallirimizni shular éliwatidu” dégen.

Xitayning mushu xildiki gherb dunyasigha mal éksport qilish miqdari ötken 11 ayda besh pirsenttin artuq töwenligen bolsa, omumiy import sommisi alte pirsent chüshüp ketken. Bolupmu amérika bazirini nishan qilghan éksport miqdari eng zor derijide töwenligen bolup, noyabirning axirida bu san 14 pirsentke yéqinlap qalghan. Mutexessisler bolsa bu sanlarning téximu zoriyip méngish éhtimalliqining chong ikenlikini tekitligen.

Amérika bashchiliqidiki gherb dunyasi bilen xitay otturisidiki sürkilishning küchiyishige egiship, Uyghur mejburiy emgiki barghanséri jiddiy témilardin bolup qalghan, shuningdek buning chétilidighan da'irisining bekmu keng ikenliki bilinishke bashlighan idi. Bu sahege munasiwetlik bir qatar qanunlarning wujudqa kélishi we xitay tawarlirigha bolghan cheklimilerning otturigha chiqishi, xitay mallirining amérika bazirigha éksport qilinishigha mu'eyyen derijide tesir körsitip kéliwatqanliqi melum.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.