Xitay hökümiti gherb dunyasini “Bextlik shinjang” modélini öginishke tewsiye qilmaqta

Xitay hökümitining Uyghurlar diyaridiki siyasiy basturush herikiti herqaysi xelq'araliq munberlerde keskin tenqidlerge duch kéliwatqanda xitay hökümiti özlirining bu herikitini dunya miqyasigha kéngeytish lazimliqi heqqide dawrang séliwatqanliqi melum.

Roytérs agéntliqining 11-iyuldiki xewiride éytilishiche, xitay diplomatliridin jyang du'en jenwediki b d t xewpsizlik kéngishide bu toghriliq söz bolghanda “Shinjangdiki tejribilirimiz emeliyette buni bashqa döletlerge ögitishke tégishlik ikenlikini namayan qildi” dégen. U bu sözlirige delil qatarida ötken ikki yilda “Térrorluqqa we esebiylikke qarshi turush” tedbirliri ijra bolghandin buyan Uyghur diyarida héchqandaq zorluq weqeliri yüz bermigenlikini misal qilghan. Shundaqla “Shinjang xelqi hazir özlirini tolimu bixeter we bextlik hés qilmaqta” dep maxtan'ghan.

D u q ning bayanatchisi dilshat réshit yerde éytiliwatqan atalmish “Shinjang xelqi” ning Uyghurlar diyarigha köchüp kéliwatqan xitay aqqunlirini körsitidighanliqini we Uyghurlarni lagérlargha solash qilmishlirini tejribe dep maxtiniwatqanliqini tekitlesh bilen birge “Bu hal xitay hökümitining qaysi derijidiki nomussiz bir hökümet ikenlikini yene bir qétim dunyagha namayan qildi” dédi.