Уйғур аптоном районлуқ партком ғәрбниң һәр саһә затлирини уйғур диярида техиму көп зиярәттә болушқа тәклип қилишни тәләп қилди

Ғәрб әллиридә хитайниң уйғур “ирқий қирғинчилиқи” ни җавабкарлиққа тартиш чуқанлири давамлишиватқан бир вақитта, уйғур аптоном районлуқ партком техиму көп ғәрбликләрни уйғур зияритидә зиярәттә болушқа тәклип қилишни тәләп қилған. Хитай һөкүмәт таратқулириниң хәвәрлиридин мәлум болушичә, бу тәләп уйғур аптоном районлуқ партком даимий комитетиниң 28-март күни үрүмчидә чақирилған йиғинида оттуриға қоюлған.

 Хитай һөкүмити һазирғичә нуқтилиқ мусулман дөләтлири вә тәрәққий тапмиған әлләрниң дипломатлири, сиясий партийә вәкиллири һәм журналистлирини уйғур диярида пиланлиқ зиярәткә уюштуруп, улар арқилиқ хәлқараға уйғур дияри вәзийитиниң “нормал” икәнликини тәшвиқ қилип кәлгән. Шуниң билән бир вақитта ғәрб ахбарати вә сиясийонлириниң уйғур диярида зиярәттә болуш тәләплирини рәт қилип кәлгән иди.

Һалбуки, уйғур аптоном районлуқ партком даимий комитетиниң бу қетимлиқ йиғинида тунҗи қетим америка қатарлиқ ғәрб дөләтлириниң һәр саһә затлирини уйғур диярида техиму көп зиярәттә болушқа тәклип қилиш оттуриға қоюлған. “тәңри тағ” тори қатарлиқ һөкүмәт таратқулириниң қәйт қилишичә, уйғур аптоном районлуқ партком даимий комитетиниң 28-мартта өткүзүлгән йиғини, хитай рәиси ши җинпиңниң йеқинда америка сода-санаәт саһәси вә истратегийә тәтқиқатчилири билән көрүшкәндә қилған сөзини йәткүзгән. Йиғин “хәлқара сәһнидә алмаштурушни актип қанат яйдуруп, хәлқара җәмийәтниң шинҗаңға болған актип тонушини үзлүксиз өстүрүш; шинҗаңниң очуқ вә өзигә болған ишәнчиниң толуқ икәнликидәк иҗабий образини намаян қилиш” ни, шундақла мәзкур район үчүн “техиму пайдилиқ ташқи муһит яритиш” ни тәләп қилған.

Ши җинпиң 27-март америка сода-санаәт саһәси вә истратегийә тәтқиқатчилири билән көрүшкәндә, икки дөләтниң зор мәсилиләрдә ортақ чиқиш нуқтиси тепишни үмид қилидиғанлиқи, бейҗиңниң иқтисади ислаһатни чоңқурлаштуруп, чәт әл мәбләғ салғучилирини техиму көп пурсәт билән тәминләйдиғанлиқини ейтқан. Бу учришиш хитайға селинған чәт әл мәблиғи җиддий төвәнләп, хитай һөкүмити мәбләғ салғучилар билән мунасивитини қайта қурушқа киришкән бир вақитта елип берилған.