Uyghur aptonom rayonluq partkom gherbning her sahe zatlirini Uyghur diyarida téximu köp ziyarette bolushqa teklip qilishni telep qildi

Gherb elliride xitayning Uyghur “Irqiy qirghinchiliqi” ni jawabkarliqqa tartish chuqanliri dawamlishiwatqan bir waqitta, Uyghur aptonom rayonluq partkom téximu köp gherbliklerni Uyghur ziyaritide ziyarette bolushqa teklip qilishni telep qilghan. Xitay hökümet taratqulirining xewerliridin melum bolushiche, bu telep Uyghur aptonom rayonluq partkom da'imiy komitétining 28-mart küni ürümchide chaqirilghan yighinida otturigha qoyulghan.

 Xitay hökümiti hazirghiche nuqtiliq musulman döletliri we tereqqiy tapmighan ellerning diplomatliri, siyasiy partiye wekilliri hem zhurnalistlirini Uyghur diyarida pilanliq ziyaretke uyushturup, ular arqiliq xelq'aragha Uyghur diyari weziyitining “Normal” ikenlikini teshwiq qilip kelgen. Shuning bilen bir waqitta gherb axbarati we siyasiyonlirining Uyghur diyarida ziyarette bolush teleplirini ret qilip kelgen idi.

Halbuki, Uyghur aptonom rayonluq partkom da'imiy komitétining bu qétimliq yighinida tunji qétim amérika qatarliq gherb döletlirining her sahe zatlirini Uyghur diyarida téximu köp ziyarette bolushqa teklip qilish otturigha qoyulghan. “Tengri tagh” tori qatarliq hökümet taratqulirining qeyt qilishiche, Uyghur aptonom rayonluq partkom da'imiy komitétining 28-martta ötküzülgen yighini, xitay re'isi shi jinpingning yéqinda amérika soda-sana'et sahesi we istratégiye tetqiqatchiliri bilen körüshkende qilghan sözini yetküzgen. Yighin “Xelq'ara sehnide almashturushni aktip qanat yaydurup, xelq'ara jem'iyetning shinjanggha bolghan aktip tonushini üzlüksiz östürüsh؛ shinjangning ochuq we özige bolghan ishenchining toluq ikenlikidek ijabiy obrazini namayan qilish” ni, shundaqla mezkur rayon üchün “Téximu paydiliq tashqi muhit yaritish” ni telep qilghan.

Shi jinping 27-mart amérika soda-sana'et sahesi we istratégiye tetqiqatchiliri bilen körüshkende, ikki döletning zor mesililerde ortaq chiqish nuqtisi tépishni ümid qilidighanliqi, béyjingning iqtisadi islahatni chongqurlashturup, chet el meblegh salghuchilirini téximu köp purset bilen teminleydighanliqini éytqan. Bu uchrishish xitaygha sélin'ghan chet el meblighi jiddiy töwenlep, xitay hökümiti meblegh salghuchilar bilen munasiwitini qayta qurushqa kirishken bir waqitta élip bérilghan.