Amérika bilen en'gliyedin xitay we rusiyege signal: "Gherb dunyasi téxi ölgini yoq"

Muxbirimiz jewlan
2021-05-04
Share

Gherbtiki démokratik döletlerdin teshkil tapqan yette dölet ittipaqi (G7) ning yuqiri derijilik ikki emeldarining düshenbe küni bildürüshiche, mezkur ittipaq özining yéngi dostlirini yénigha tartip, xitay bilen rusiyening bésimigha taqabil turmaqchi bolghan.

Roytéris agéntliqining 4-may bergen xewiride éytilishiche, yette dölet ittipaqi tashqi ishlar ministirliri yighinida amérika tashqi ishlar ministiri antoni bilinkén amérikaning gherb dunyasidiki ittipaqdashliri bilen qaytidin mustehkem munasiwet ornitidighanliqi heqqide uchur bergen. U en'gliye tashqi ishlar ministiri domink rab bilen ötküzgen axbarat élan qilish yighinida mundaq dégen: "Bizning meqsitimiz xitayni cheklesh yaki xitayni bésishqa urunush emes. Emma gherb döletliri xelq'ara tertipni qoghdaydu, xitay we bashqa her qandaq döletning buzghunchiliqigha yol qoymaydu".

Xitayning 40 yildin buyan tereqqiy qilip, iqtisad we herbiy jehettin bash kötürüshi, rusiyening xitay bilen yéqinliship gherbke tehdit peyda qilishi we bularning 1991-yil sowét ittipaqi parchilinip soghuq munasiwetler ayaghlashqandin kéyinki eng chong siyasiy hadise bolup qalghanliqi bu qétimliq yighinning muhim témisi bolghan, ministirlar gherb döletlirining öz ornini qoghdash üchün buningdin kéyin téximu zich hemkarlishidighanliqi heqqide uchur bergen.

En'gliye bash ministiri domink rab mundaq dégen: "Men shuni körüp yettimki, idiye we qimmet qarishi oxshash döletler köp tereplimilik munasiwet we hemkarliqni dawamliq kücheytishi kérek. Bu döletler birleshkendila yéterlik hayatiy küchke ige bolalaydu".

Amérika tashqi ishlar ministiri antoni blinkénning bildürüshiche, amérika rusiye bilen téximu muqim munasiwet ornitishni xalaydu. Emma bu köp hallarda rusiye prézidénti putinning herikitige baghliq.

Yette dölet ittipaqi 1975-yil qurulghan bolup, amérika, en'gliye, kanada, firansiye, gérmaniye, italiye, yaponiye qatarliq döletlerdin teshkil tapqan؛ bu qétimliq yighin'gha yene yuqiriqi yette dölettin bashqa awstraliye, hindistan, jenubiy afriqa we koréyening tashqi ishlar ministirlirimu teklip qilin'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet