Җяңсулуқ сақчиниң аялиниң ғулҗидики вәзийәткә аит баянлири елан қилинди

Йеқиндин буян тәйвәнниң “п т т” намлиқ бир тор бетидә уйғур елиниң һазирқи вәзийити үстидә елан қилинған бир учур иҗтимаий алақә васитилири арқилиқ кәң тарқилип, күчлүк инкас қозғиди.

Мәзкур учурни йолдиши “шинҗаңға ярдәм бериш” хизмити бойичә ғулҗида сақчилиқ вәзиписи өтәватқан җяңсулуқ ваң фамилилик бир сақчиниң аяли ашкарилиған. У йолдишиниң дадиси ағрип қалғанлиқи үчүн җяңсуға рухсәт сорап йенип кәлгәндә у йәрдики вәзийәт һәққидә өзигә ейтип бәргәнлирини юқириқи бу тор бәттә елан қилған.

У испатнамисидә ғулҗида толиму еғир назарәт вә тәқиб йолға қоюлуватқанлиқини, һәр 500 метирда бирдин сақчи понкити, һәрбир ишик алдида бирдин камера болғандин сирт йәнә бәзи орунларда мәхпий камералар барлиқини вә бу камераларниң нурғун кишиләрниң тутқун қилинишиға сәвәб болғанлиқини билдүргән.

У йәнә мәһәллә аһалилириниң һәр күни нөвәтлишип постта туридиғанлиқи, һәр күни ахшам 6 дә хитайчә вә сиясий қанун дәрси аңлашқа, әтигәндә байрақ чиқиришқа чиқидиғанлиқи, кочиларда кишиләрниң өз-ара он минуттин артуқму параңлишип туралмайдиғанлиқи, һәммила йәрдә тәкшүрүш-назарәт барлиқини, қисқиси бу йәрдики вәзийәтниң тәсвирлигүсиз дәриҗидә еғирлиқини баян қилған.

У йәнә мәктәпләрдә балиларға уйғурчә, қазақчә дегәндәк ана тил дәрслириниң берилмәйдиғанлиқини, лагерлардики тутқунларниң һәр күни 12 саәт бойичә мәҗбурий әмгәккә селиниватқанлиқидәк бир қатар мәлуматларниму бәргән.

Болупму у испатнамисидә уйғур елидики бу вәзийәтниң нөвәттә шу йәрдики хитай пуқралириниму җүмлидин шу йәрләрдә муқимлиқ үчүн яки лагерларда хизмәт қиливатқан хитайлардиму қаттиқ наразилиқ пәйда қилғанлиқини, уларниңму һазир хитай дөләт рәиси ши җинпиң оттуриға қойған вә уйғур районлуқ партком секретари чен чүәнго тәрипидин иҗра қилиниватқан бу юқири бесимлиқ сиясәтләрдин җақ тойғанлиқини билдүргән.

Юқириқи бу ваң фамилилик аялниң ашкарилиғанлири йеқиндин буян радийомиз мухбирлири вә башқа ахбарат васитилири игилигән учурлар вә башқа гуваһлиқ бәргүчиләрниң вәзийәт һәққидики ейтқанлириниң тоғрилиқини йәниму илгирилигән һалда испатлап бәргән.

Йеқинда “зимистан” тори зиярәт қилған бир хитай лагер хизмәтчисиму өзиниң бу хизмитидин тойғанлиқини, лагерда хизмәт қилидиғанларниңму еғир роһий бесим астида қалғанлиқини, өзлириниңму халиған вақитта өйигә қайтип, сиртқа чиқалмайдиғанлиқини баян қилған иди.