Jyangsuluq saqchining ayalining ghuljidiki weziyetke a'it bayanliri élan qilindi

Muxbirimiz irade
2019-01-17
Élxet
Pikir
Share
Print

Yéqindin buyan teywenning "P t t" namliq bir tor bétide Uyghur élining hazirqi weziyiti üstide élan qilin'ghan bir uchur ijtima'iy alaqe wasitiliri arqiliq keng tarqilip, küchlük inkas qozghidi.

Mezkur uchurni yoldishi "Shinjanggha yardem bérish" xizmiti boyiche ghuljida saqchiliq wezipisi ötewatqan jyangsuluq wang famililik bir saqchining ayali ashkarilighan. U yoldishining dadisi aghrip qalghanliqi üchün jyangsugha ruxset sorap yénip kelgende u yerdiki weziyet heqqide özige éytip bergenlirini yuqiriqi bu tor bette élan qilghan.

U ispatnamiside ghuljida tolimu éghir nazaret we teqib yolgha qoyuluwatqanliqini, her 500 métirda birdin saqchi ponkiti, herbir ishik aldida birdin kaméra bolghandin sirt yene bezi orunlarda mexpiy kaméralar barliqini we bu kaméralarning nurghun kishilerning tutqun qilinishigha seweb bolghanliqini bildürgen.

U yene mehelle ahalilirining her küni nöwetliship postta turidighanliqi, her küni axsham 6 de xitayche we siyasiy qanun dersi anglashqa, etigende bayraq chiqirishqa chiqidighanliqi, kochilarda kishilerning öz-ara on minuttin artuqmu parangliship turalmaydighanliqi, hemmila yerde tekshürüsh-nazaret barliqini, qisqisi bu yerdiki weziyetning teswirligüsiz derijide éghirliqini bayan qilghan.

U yene mekteplerde balilargha Uyghurche, qazaqche dégendek ana til derslirining bérilmeydighanliqini, lagérlardiki tutqunlarning her küni 12 sa'et boyiche mejburiy emgekke séliniwatqanliqidek bir qatar melumatlarnimu bergen.

Bolupmu u ispatnamiside Uyghur élidiki bu weziyetning nöwette shu yerdiki xitay puqralirinimu jümlidin shu yerlerde muqimliq üchün yaki lagérlarda xizmet qiliwatqan xitaylardimu qattiq naraziliq peyda qilghanliqini, ularningmu hazir xitay dölet re'isi shi jinping otturigha qoyghan we Uyghur rayonluq partkom sékrétari chén chüen'go teripidin ijra qiliniwatqan bu yuqiri bésimliq siyasetlerdin jaq toyghanliqini bildürgen.

Yuqiriqi bu wang famililik ayalning ashkarilighanliri yéqindin buyan radiyomiz muxbirliri we bashqa axbarat wasitiliri igiligen uchurlar we bashqa guwahliq bergüchilerning weziyet heqqidiki éytqanlirining toghriliqini yenimu ilgiriligen halda ispatlap bergen.

Yéqinda "Zimistan" tori ziyaret qilghan bir xitay lagér xizmetchisimu özining bu xizmitidin toyghanliqini, lagérda xizmet qilidighanlarningmu éghir rohiy bésim astida qalghanliqini, özliriningmu xalighan waqitta öyige qaytip, sirtqa chiqalmaydighanliqini bayan qilghan idi.

Toluq bet