Gollandiye “Xitay saqchi ponkiti” ni taqash buyruqi chiqardi

“Gollandiye waqti” gézitining 2-noyabirdiki xewiride éytilishiche, gollandiye hökümiti buyruq chüshürüp amistérdam we rottérdam sheherliridiki “Xitay saqchi ponkiti” ni taqashni buyrughan. Melum bolushiche bu saqchi ponkitliri 2018-yilidin bashlap öz “Xizmet” lirini dawam qildurup kelmektiken.

Yéqinda ispaniyediki “Hémayichilerge bashpanah” teshkilati neq meydan tekshürüshi arqiliq xitay hökümitining chet'ellerde 54 “Saqchi ponkiti” tesis qilghanliqi, shu qatarda gollandiyede bundaq ponkittin ikkisi qurulghanliqini élan qilghan idi. Tekshürüshte éytilishiche, bu ponkitlar gollandiye hökümitining xewiri bolmighan ehwalda qurulghan bolup, asasiy jehettin xitaygha qarshi chuqanlarni jimiqturush, xitay puqraliqidiki kishilerni qayturup kétish dégendek ishlar bilen shughullinidiken. Xitay hökümitining igilik hoquqqa ige bir musteqil dölette bu xil saqchi ponkitliri tesis qilip bu jaylarda xitay döliti üchün ish béjirishi xelq'ara qanunlargha xilap qilmish hésablinidiken.

Gollandiye tashqi ishlar ministiri wopké xokstra (Wopke Hoekstra) bu heqte özining tiwittér bétide uchur yollap “Bu xildiki saqchi ponkiti qurushta gollandiye hökümitining ijaziti élinmighanliqi üchün biz xitay elchixanisigha bularni tézdin taqash toghrisida buyruq chüshürduq” dégen.

2-Noyabir küni xitay tashqi ishlar ministirliqi bu heqte bayanat élan qilip “Bu ishxanilar saqchi ponkiti emes. Eksiche puqralarning pasport höjjetlirini yenggüshlishige yardem béridighan orunlar” dégen hemde bundaq saqchi ponkitlirining mewjutluqini inkar qilghan.