«Вашингтон почтиси» гезитиниң истон язғучиси җош рогин америкалиқларни «гугул уйғур» һәрикитигә диққәт қилишқа чақирди

Мухбиримиз ирадә
2019-11-01
Елхәт
Пикир
Share
Принт

Америкадики нопузлуқ гезитләрдин болған «вашингтон почтиси» гезитиниң тонулған истон язғучиси җош рогин 31-өктәбир күнидики язмисини уйғурларға беғишлиди.

У америкадики бир гурруппа уйғур яшлириниң америка дөләтлик васкетбол җәмийити NBA ниң вашингтон алаһидә районидики «капитал бир» намлиқ тәнтәрбийә сарийида 30-өктәбир күни өткүзүлгән мусабиқә мәйданиға кирип, «гугул уйғур» дегән хәт йезилған майкиларни кийиш арқилиқ қилған намайишини асасий тема қилған болуп, америкалиқларни бу яшларниң чақириқиға қулақ селишқа чақирди. 

У мақалисидә бир гуруппа уйғур яшлириниң шу күни «уйғур, тибәт вә хоңкоңлуқларға әркинлик» дәп намайиш қилғанлиқини, уларниң америкалиқлардин «уйғур» дегән сөзни гугул торида издәп көрүшини тәләп қилғанлиқини баян қилип, «сиз бу һәқтә издинип, һәқиқәтни билип беқиң. Андин пакитлар алдида немә қилишиңиз керәкликини қарар қилсиңиз болиду,» дәп язған. 

У йәнә «әгәр сиз уйғур дәп гугул қилған һаман хитай һөкүмитиниң уларға қорқунчлуқ зулум қиливатқанлиқини вә шинҗаңниң һәрқайси җайлирида 1 милйондин ошуқ кишини сәвәбсизла тутқун қилғанлиқидин хәвәр таписиз,» дегән. 

Җош рогин мақалисидә юқириқи яшларниңму юртидики аилә әзалириниң хитайниң өч елиш нишани болуш бәдилигә мушундақ намайишларни тәшкилләватқанлиқини алаһидә әскәртиш билән биргә NBA ниң хоңкоң мәсилисидә хитай һөкүмитигә тез пүккәнликини тәнқид қилған. 

У гәрчә трамп һөкүмити уйғурлар үчүн башқа һәрқандақ бир һөкүмәттин көп ишларни қилип бәргән болсиму, буниң йәнила йетәрлик әмәсликини тәкитләп, трамп һөкүмитини хитайниң сода җәһәттә келишиш һәққидики қилтиқиға чүшмәсликкә дәвәт қилған. Җош рогин мақалиси ахирида америка хәлқидин уйғурларниң мәсилисигә көңүл бөлүшни тәләп қилип «уйғурлар америка хәлқигә хитаб қиливатиду. Чүнки биз уларниң бирдин-бир үмиди,» дегән.

Пикирләр (0)
Share
Толуқ бәт