"Washin'gton pochtisi" gézitining iston yazghuchisi josh rogin amérikaliqlarni "Gugul Uyghur" herikitige diqqet qilishqa chaqirdi

Muxbirimiz irade
2019-11-01
Élxet
Pikir
Share
Print

Amérikadiki nopuzluq gézitlerdin bolghan "Washin'gton pochtisi" gézitining tonulghan iston yazghuchisi josh rogin 31-öktebir künidiki yazmisini Uyghurlargha béghishlidi.

U amérikadiki bir gurruppa Uyghur yashlirining amérika döletlik waskétbol jem'iyiti NBA ning washin'gton alahide rayonidiki "Kapital bir" namliq tenterbiye sariyida 30-öktebir küni ötküzülgen musabiqe meydanigha kirip, "Gugul Uyghur" dégen xet yézilghan maykilarni kiyish arqiliq qilghan namayishini asasiy téma qilghan bolup, amérikaliqlarni bu yashlarning chaqiriqigha qulaq sélishqa chaqirdi. 

U maqaliside bir guruppa Uyghur yashlirining shu küni "Uyghur, tibet we xongkongluqlargha erkinlik" dep namayish qilghanliqini, ularning amérikaliqlardin "Uyghur" dégen sözni gugul torida izdep körüshini telep qilghanliqini bayan qilip, "Siz bu heqte izdinip, heqiqetni bilip béqing. Andin pakitlar aldida néme qilishingiz kéreklikini qarar qilsingiz bolidu," dep yazghan. 

U yene "Eger siz Uyghur dep gugul qilghan haman xitay hökümitining ulargha qorqunchluq zulum qiliwatqanliqini we shinjangning herqaysi jaylirida 1 milyondin oshuq kishini sewebsizla tutqun qilghanliqidin xewer tapisiz," dégen. 

Josh rogin maqaliside yuqiriqi yashlarningmu yurtidiki a'ile ezalirining xitayning öch élish nishani bolush bedilige mushundaq namayishlarni teshkillewatqanliqini alahide eskertish bilen birge NBA ning xongkong mesiliside xitay hökümitige téz pükkenlikini tenqid qilghan. 

U gerche tramp hökümiti Uyghurlar üchün bashqa herqandaq bir hökümettin köp ishlarni qilip bergen bolsimu, buning yenila yéterlik emeslikini tekitlep, tramp hökümitini xitayning soda jehette kélishish heqqidiki qiltiqigha chüshmeslikke dewet qilghan. Josh rogin maqalisi axirida amérika xelqidin Uyghurlarning mesilisige köngül bölüshni telep qilip "Uyghurlar amérika xelqige xitab qiliwatidu. Chünki biz ularning birdin-bir ümidi," dégen.

Toluq bet