رۇسىيە ئاگېنتلىقىنىڭ 30-ئاۋغۇست كۈنىدىكى خەۋىرىگە قارىغاندا، سابىق سوۋېت ئىتتىپاقىنىڭ ئاخىرقى رەھبىرى مىخائىل گورباچېۋ شۇ كۈنى كېسەل بىلەن 91 يېشىدا ۋاپات بولغان.
مەلۇماتلارغا قارىغاندا، گورباچېۋ 1931-يىلى 3-ئاينىڭ 2-كۈنى تۇغۇلغان، 1985-يىلى 3-ئايدىن باشلاپ سوۋېت كوممۇنىستىك پارتىيەسى مەركىزىي كومىتېتىنىڭ باش سېكرېتارى بولغان. 1989-يىلى 5-ئايدىن 1990-يىل 3-ئايغىچە سوۋېت ئىتتىپاقى ئالىي سوۋېتىنىڭ رەئىسى، 1990-يىلى 3-ئايدىن كېيىن، سوۋېت ئىتتىپاقىنىڭ تۇنجى پرېزىدېنتى بولغان. 1991-يىلى سوۋېت ئىتتىپاقى پارچىلانغاندىن كېيىن ھوقۇقىدىن ئايرىلىپ، يېزىقچىلىق قىلىش، نۇتۇق سۆزلەش قاتارلىق پائالىيەتلەر بىلەن شۇغۇللانغان.
گورباچېۋ ئۆز ۋاقتىدا ئىسلاھات روھى بىلەن تونۇلغان مەشھۇر سىياسىيون بولۇپ، غەرب دۇنياسى بىلەن بولغان مۇناسىۋەتنى ياخشىلاشقا تىرىشقان ھەمدە ئامېرىكا بىلەن «ھەربىي قوراللارنى تىزگىنلەش» كېلىشىمى تۈزگەن. ئۇ 1990-يىل نوبېل تىنچلىق مۇكاپاتىغا ئېرىشكەن بولۇپ، سوۋېت ئىتتىپاقىنىڭ پارچىلىنىشىغا ھەسسە قوشقانلىق تۆھپىسى بىلەن غەرب دۇنياسىدا قەھرىمانلىق ئوبرازىنى تىكلىگەن.
«ئاكسيۇس» تورى گورباچېۋنىڭ ۋاپاتى ھەققىدە بەرگەن خەۋىرىدە ئۇنىڭغا «20-ئەسىرنىڭ كېيىنكى يېرىمىدىكى مۇھىم سىياسىي رەھبەر» دەپ باھا بەرگەن. خەۋەردە ئېيتىلىشىچە، رۇسىيە پرېزىدېنتى ۋىلادىمىر پۇتىن سوۋېت ئىتتىپاقىنىڭ پارچىلىنىشىنى «تارىخىي تراگېدىيە» دەپ ئاتىغان. پۇتىننىڭ بۈگۈنكى كۈندە رۇسىيەنى مۇستەبىتلىك، جاھانگىرلىك يولىغا باشلىشى، ئۇكرائىناغا ھۇجۇم قىلىشى گورباچېۋنىڭ ئەينى ۋاقىتتىكى تارىخىي تۆھپىسىنى، تىنچلىق، ئەركىنلىك، دېموكراتىيەنىڭ ھەممىدىن مۇھىم ئىكەنلىكىنى دۇنياغا تېخىمۇ نامايان قىلىدىكەن.