Gu'angjuda bir méhmanxana “Térrorluq” qa chétishliq bir yoluchini saqchigha melum qilmighachqa jerimane töligen

Xitayning gu'angju shehiride bir méhmanxana “Térrorluq” qa chétishliq, dep qaralghan bir yoluchining tepsiliy uchurini tizimgha almighachqa 100 ming som jerimane töligen. “Gu'angju géziti” ning xewer qilishiche, u méhmanxanida qon'ghan yoluchi bir térrorluq délosigha chétishliqken.

Da'iriler, méhmanxanini u yoluchining tepsiliy uchurini tizimlap, tégishlik sistémigha kirgüzmigen, dep eyibligen. Emma xewerde, u yoluchining ismi, milliti, méhmanxanining nami, weqening qachan yüz bergenliki, u “Térrorluq” délosining qandaq weqe ikenliki heqqide héchqandaq uchur bermigen.

Kishilik hoquq teshkilatlirining qeyt qilishiche, xitayda hökümet térrorluq, dep qarighan mutleq köp qisim délo we shexsler Uyghurlargha chétishliqken.

Her qaysi ölkiler ilgiri yerlik belgilime chiqirip, méhmanxanilarning Uyghurlargha yataq bermeslikini, eger yataq berse yoluchining tepsiliy uchurini derhal yerlik bixeterlik organlirining tor sistémisigha kirgüzüp, saqchigha melum qilishni telep qilip kelgen.

Bu yerlik belgilime xitayning 2015 - yili 12 - ayda chiqarghan “Térrorluqqa qarshi turush qanuni” gha kirgüzülüp, xilapliq qilghuchilargha jerimane qoyush békitilgen idi. Mezkur qanun kishilik hoquq teshkilatlirining izchil tenqidige uchrap kelgen.

Ularning ilgiri sürüshiche, bu qanunning qaratmiliqi küchlük, uningda xitay bixeterlik we edliye tarmaqlirining qanunluq Uyghur öktichilerni térrorluqqa baghlap basturushi qanunlashturulghan.

“Gu'angju géziti” ning xewer qilishiche, da'iriler yene méhmanxanining shu künki nöwetchi diréktorigha ayrim 10 ming som jerimane qoyghan.