Америкалиқ яшлар «гугул уйғур һәрикити» арқилиқ лагер мәсилисигә диққәт тартти

Мухбиримиз ирадә
2019-10-10
Елхәт
Пикир
Share
Принт

9-Өктәбир күни американиң вашингтон алаһидә райониға җайлашқан «капитал бир» намлиқ васкетбол мусабиқә мәйданида үч америкалиқ яш «гугул издәш торида уйғурларға диққәт бериңлар» дегән хәтни тутуп туруп, хитай һөкүмити уйғур елида йолға қоюватқан җаза лагерлириға диққәт тартти.

Мәзкур һәрикәтни орунлаштурғучиларниң бири болған җон шивиппиниң тивиттер арқилиқ тарқатқан учуридики көрүнүшлиригә асасланғанда, 10-өктәбир күни бу мәйданда америкадики «визердис» командиси билән хитайниң гуаңҗу шәһиридин кәлгән «узун шир» командисиниң мусабиқиси өткүзүлгән. юқириқи бу 3 яш паалийәтчи мәйданға кирип тамашибинлар арисида «хоңкоңға әркинлик» дегән хәт йезилған майкини кийип, қолида йәнә охшаш хәт йезилған қәғәзни тутуп турған.

Уларниң бу һәрикити узун өтмәйла мәйдандики бихәтәрлик хадимлириниң диққитини қозғиған болуп, аманлиқ хадимлири келип улардин бу хәтни еливалған. Андин кейин әгәр йәнә шоар йезилған хәт көтүргән тәқдирдә мәйдандин чиқириветидиғанлиқини уқтурған. Әмма бу яшлар арқидинла йәнә қолиға «уйғурларни гугул торидин издәңлар» хәт йезилған бир парчә қәғәзни көтүрүп турған.

Буниң билән узун өтмәй йәнә икки нәпәр мәсул хадим келип улардин бу мусабиқә мәйданида сиясий паалийәт билән шуғулланмаслиқни тәләп қилған. Паалийәтчи яшлардин бири буниңға җавабән «биз бу йәрдә сиясәт қилмидуқ. Пәқәтла кишиләргә гугул торида уйғур дегән сөзни киргүзүп, уларниң кимлики һәққидә издинишни тәвсийә қиливатимиз. Бу дегән билим, сиясәт әмәс,» дәп җаваб бәргән.

У йәнә юқириқи мәсул кишигә: «мән сизгә әһвални чүшәндүрүп қояй, уйғурлар дегән хитайдики мусулман аз санлиқ милләт. Улар һазир хитай һөкүмити тәрипидин йиғивелиш лагерлириға қамалди,» дәйду. Бирақ юқириқи хадим бу йәрдә сиясий тәшвиқат билән шуғулланса болмайдиғанлиқини тәкрарлап, уларниң қолидики хәтни тартивалған.

Юқириқи бу көрүнүшләр тивиттер торида елан қилинғандин кейин күчлүк инкас қозғиди вә зор алқишқа еришти. Бу тивиттерда қайтурулған инкасларға қариғанда, нурғун кишиләр һәқиқәтән гугул ториға кирип уйғурларниң кимлики һәққидә издәнгән.

Юқириқи яшларниң һәрикити америкада NBA васкитбол гурупписиниң хоңкоң намайишчилирини қоллиған тивити сәвәблик хитайдин кәчүрүм сориши күчлүк инкас қозғаватқан бир пәйттә елип берилған интайин үнүмлүк бир һәрикәт, дәп қаралмақта.

Пикирләр (0)
Share
Толуқ бәт