Amérikaliq yashlar "Gugul Uyghur herikiti" arqiliq lagér mesilisige diqqet tartti

Muxbirimiz irade
2019-10-10
Élxet
Pikir
Share
Print

9-Öktebir küni amérikaning washin'gton alahide rayonigha jaylashqan "Kapital bir" namliq waskétbol musabiqe meydanida üch amérikaliq yash "Gugul izdesh torida Uyghurlargha diqqet béringlar" dégen xetni tutup turup, xitay hökümiti Uyghur élida yolgha qoyuwatqan jaza lagérlirigha diqqet tartti.

Mezkur heriketni orunlashturghuchilarning biri bolghan jon shiwippining tiwittér arqiliq tarqatqan uchuridiki körünüshlirige asaslan'ghanda, 10-öktebir küni bu meydanda amérikadiki "Wizérdis" komandisi bilen xitayning gu'angju shehiridin kelgen "Uzun shir" komandisining musabiqisi ötküzülgen. Yuqiriqi bu 3 yash pa'aliyetchi meydan'gha kirip tamashibinlar arisida "Xongkonggha erkinlik" dégen xet yézilghan maykini kiyip, qolida yene oxshash xet yézilghan qeghezni tutup turghan.

Ularning bu herikiti uzun ötmeyla meydandiki bixeterlik xadimlirining diqqitini qozghighan bolup, amanliq xadimliri kélip ulardin bu xetni éliwalghan. Andin kéyin eger yene sho'ar yézilghan xet kötürgen teqdirde meydandin chiqiriwétidighanliqini uqturghan. Emma bu yashlar arqidinla yene qoligha "Uyghurlarni gugul toridin izdenglar" xet yézilghan bir parche qeghezni kötürüp turghan.

Buning bilen uzun ötmey yene ikki neper mes'ul xadim kélip ulardin bu musabiqe meydanida siyasiy pa'aliyet bilen shughullanmasliqni telep qilghan. Pa'aliyetchi yashlardin biri buninggha jawaben "Biz bu yerde siyaset qilmiduq. Peqetla kishilerge gugul torida Uyghur dégen sözni kirgüzüp, ularning kimliki heqqide izdinishni tewsiye qiliwatimiz. Bu dégen bilim, siyaset emes," dep jawab bergen.

U yene yuqiriqi mes'ul kishige: "Men sizge ehwalni chüshendürüp qoyay, Uyghurlar dégen xitaydiki musulman az sanliq millet. Ular hazir xitay hökümiti teripidin yighiwélish lagérlirigha qamaldi," deydu. Biraq yuqiriqi xadim bu yerde siyasiy teshwiqat bilen shughullansa bolmaydighanliqini tekrarlap, ularning qolidiki xetni tartiwalghan.

Yuqiriqi bu körünüshler tiwittér torida élan qilin'ghandin kéyin küchlük inkas qozghidi we zor alqishqa érishti. Bu tiwittérda qayturulghan inkaslargha qarighanda, nurghun kishiler heqiqeten gugul torigha kirip Uyghurlarning kimliki heqqide izden'gen.

Yuqiriqi yashlarning herikiti amérikada NBA waskitbol guruppisining xongkong namayishchilirini qollighan tiwiti seweblik xitaydin kechürüm sorishi küchlük inkas qozghawatqan bir peytte élip bérilghan intayin ünümlük bir heriket, dep qaralmaqta.

Toluq bet