Әркин асия радийоси уйғур бөлүминиң мухбири гүлчеһрә хоҗа «ахбаратчилиқтики җасарәт мукапати» ға еришти

Мухбиримиз ирадә
2020-05-21
Елхәт
Пикир
Share
Принт

Әркин асия радиоси уйғур бөлүминиң мухбири гүлчеһрә хоҗа уйғур елидә йүз бериватқан кишилик һоқуқ дәпсәндичилики һәққидики муһим хәвәрлири билән «хәлқара аяллар ахбарат фонди» тәсис қилған «ахбаратчилиқтики җасарәт мукапати» ға еришти.

Тәсис қилинғанлиқиға 30 йил болған бу мукапат чәкләнгән темиларни хәвәр қилған, аялларға интайин қийин болған муһитларда хизмәт қилидиған вә ашкарилаш қийин болған һәқиқәтләрни дуняға ашкарилашта рол ойниған журналистларға берилидикән.

Әркин асия радийосиниң башлиқи бей фаң мухбиримиз гүлчеһрәни тәбрикләп елан қилған баянатида: «мухбиримиз гүлчеһрә вә әркин асия радийоси уйғур бөлүминиң мунәввәр ахбарат хәвәрлири уйғур елидә йүз бериватқан кишилик һоқуқ кризиси һәққидә дуняни әң балдур агаһландурди. Улар бу һекайиләрниң әң алдинқи сепидин орун алди. Гүлчеһрә вә униң хизмәтдашлири әркин асия радийосиниң аңлиғучилириға вә дуняға бу һалқилиқ хәвәрләрни йәткүзүш йолида үзлүксиз һалда тәһдит вә хирисларға дуч кәлди. Бу һәқиқәтән муәййәнләштүрүшкә тегишлик бир нәтиҗә,» деди.

Мухбиримиз гүлчеһрә өзиниң бу мукапатқа еришкәнликидин шәрәп һес қилидиғанлиқини билдүрүш билән биргә, буниң адаләт вә һәқиқәтни издәш йолидики күрәшкүчиләргә илһам болушини үмид қилидиғанлиқини ейтти.

Әркин асия радийоси уйғур бөлүми уйғур елидә аз дегәндә 2 милйон әтрапида кишиниң лагерларға тутқун қилиниватқанлиқини әң дәсләп байқиған вә буни дуняға тунҗи болуп ашкарилиған таратқу иди. Хитай һөкүмити гүлчеһрә хоҗа қатарлиқ 6 нәпәр уйғур мухбиримизниң уруқ-туғқанлирини лагерға қамиған иди. Бу 6 мухбиримиз лагерларға тутқун қилинған уруқ-туғқанлири һәққидә гуваһлиқ берип зор инкас қозғиған вә америка һөкүмитиниң бу мәсилигә диққәт қилишиға түрткә болған иди.

Мухбиримиз гүлчеһрә уйғур елидә җаза лагерлириға йеқин җайда көпләп җәсәт көйдүрүш орниниң ясилиши, аял мәһбусларниң туғмас қилиниши вә җинсий паракәндичиликкә учриши һәм шундақла ата-аниси тутуп кетилгән уйғур балилириниң әһвали һәққидә көп қетим муһим хәвәрләрни ишлигән иди. Әркин асия радийоси уйғур бөлүмидики барлиқ хизмәтдашлар гүлчеһрәниң у мукапатқа еришкәнликидин сөйүниду вә уни қизғин тәбрикләйду.

Пикирләр (0)
Share
Толуқ бәт