Amérika xelq'ara diniy erkinlik komitéti: "Gülmire imin derhal qoyup bérilsun"

Muxbirimiz erkin
2019-02-15
Élxet
Pikir
Share
Print

Amérika xelq'ara diniy erkinlik komitéti 15‏-féwral bayanat élan qilip, 2009‏-yili xitay hökümiti teripidin muddetsiz qamaq jazasigha höküm qilin'ghan Uyghur tor tehriri gülmire iminning derhal qoyup bérilishini telep qildi.

Mezkur komitétning qosh re'islirining biri tenzin dorjéning namida élan qilin'ghan bayanatta yene, xitay hökümitining gülmire iminni asassiz qamaq jazasigha höküm qilghanliqi tenqidlen'gen.

Gülmire imin eyni chaghda bir tor bétining xewer we medeniyet sehipisining tehriri bolup, 2009‏-yili ürümchi "5‏-Iyul weqesi" partlap 9 kündin kéyin qolgha élin'ghan. U 2010‏-yili 4‏-ayda "5‏-Iyul weqesi" ni teshkilligen dep eyiblinip muddetsiz qamaq jazasigha höküm qilin'ghan idi.

Amérika xelq'ara diniy erkinlik komitéti birqanche yil awwal uni "Qutquzulidighan wijdan mehbusliri" ning tizimlikige kirgüzgen idi.

Tenzin dorjé bayanatida, xitay hökümitining ötken yekshenbe küni ataqliq muzikant abduréhim héytning widiyosini élan qilishi, dunya miqyasida Uyghurlarning uruq-tughqanlirining widiyosini élan qilishni telep qilish herikiti qozghiwetkenlikini bildürüp: "Bu yil, gülmire iminning muddetsiz qamaqqa höküm qilin'ghanliqining 10 yilliq xatirisi.

Amérika xelq'ara diniy erkinlik komitéti uninggha artilghan asassiz eyibleshni tenqidleydu hem xitay da'irilirini uni derhal we shertsiz qoyup bérishke chaqiridu" dégen.

Tenzin dorjéning tekitlishiche, u pa'aliyetchiler we tutqunlarning uruq-tughqanliri qozghighan söyümlük kishilirining saq-salamet turghanliqigha da'ir delillerni élan qilishni telep qilish tirishchanliqigha qayil bolghan.

U yene bayanatida: "Xitay hökümitining xalighanche we naheq tutqun qilghan milyonlighan musulmanlarni choqum qoyup bérishi kérek" likini bildürgen. U bayanatining axirida, xitay hökümitining diniy étiqadni "Xitaylashturush" herikitini tenqidligen.

Tenzin dorjé xitayning bu arqiliq her xil étiqadlarni sotsiyalizmgha maslashturup, ularni bashqurmaqchi we kontrol qilmaqchi boluwatqanliqini tekitligen. Uning ilgiri sürüshiche, nöwette 800 mingdin 2 milyon'ghiche musulman Uyghur yighiwélish lagérlirida tutup turulmaqta iken.

Toluq bet