Хитай һөкүмити гүлшән аббасни "терорлуқ" билән әйиблиди

Мухбиримиз әзиз
2020-12-31
Share

Америка ташқий ишлар министирлиқи 30-декабир күни лагррға қамалған уйғур дохтур гүлшән аббасниң 20 йиллиқ муддәтлик қамаққа һөкүм қилинғанлиқи мунасивити билән мәхсус гуваһлиқ бериш йиғини өткүзгән һәмдә өзлириниң һәрқачан из-дерәксиз ғайип болуватқан уйғурлар билән һәмнәпәс болидиғанлиқини билдүргән иди. Америка ташқий ишлар министирлиқиниң тивиттер бетидә елан қилинған бу һәқтики баянатта болса "биз һәқиқәтни һемайә қилип, хитай һөкүмитиниң бу хил йолсизларчә қилмишини кәскин әйибләймиз," дейилгән.

Аридин бир күн өткәндә хитай һөкүмити буниңға наразилиқ билдүрүп, америка һөкүмитиниң бу баянлирини рәт қилидиғанлиқини билдүргән. "явропа хәвәрлири" телевизийәсиниң 31-декабирдики хәвиридә ейтилишичә, хитай ташқий ишлар министирлиқиниң баянатчиси ваң венбин бейҗиңда өткүзүлгән мухбирларни күтүвелиш йиғинида ройтерс агентлиқиниң бу һәқтики соалиға җаваб берип: "гүлшән аббас терорлуқ тәшкилатиға қатнашқан һәмдә терорлуқ җинайәтлиригә ярдәм бәргән. Шундақла җәмийәт тәртипини қалаймиқанлаштуруш җинайити садир қилған," дегән. Шуниң билән биргә америка һөкүмитиниң мушундақ бир "терорчи" ни ақлиши вә қоюп беришни тәләп қилишидин өзлириниң һәйран болғанлиқини билдүргән.

Америкадики уйғур паалийәтчи рошән аббас болса хитай һөкүмитиниң мушу хил усулда өзиниң америкадики уйғур даваси үчүн қиливатқан паалийәтлиридин "қисас" еливатқанлиқини тәкитләйду. У хитай ташқий ишлар миснистирлиқиниң бу һәқтики баянатини кәскин рәт қилип: "бир ана һәмдә пенсийәгә чиққан дохтур болған һәдәм гүлшән аббасни номуссизларчә мәхпий сот биләнла терорлуққа четип 20 йиллиқ қамаққа һөкүм қиливетиш хитайниң қанун дөлити ‍әмәсликини, әксичә униңда һөкүм сүриватқини қарақчилиқ тәбиити икәнликини дуняға йәнә бир қетим ашкара қилди." деди. Шундақла у өзиниң буниңлиқ билән уйғур давасидин һәргизму тохтап қалмайдиғанлиқини билдүрди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт