Xitay hökümiti gülshen abbasni "Térorluq" bilen eyiblidi

Muxbirimiz eziz
2020-12-31
Share

Amérika tashqiy ishlar ministirliqi 30-dékabir küni lagrrgha qamalghan Uyghur doxtur gülshen abbasning 20 yilliq muddetlik qamaqqa höküm qilin'ghanliqi munasiwiti bilen mexsus guwahliq bérish yighini ötküzgen hemde özlirining herqachan iz-déreksiz ghayip boluwatqan Uyghurlar bilen hemnepes bolidighanliqini bildürgen idi. Amérika tashqiy ishlar ministirliqining tiwittér bétide élan qilin'ghan bu heqtiki bayanatta bolsa "Biz heqiqetni hémaye qilip, xitay hökümitining bu xil yolsizlarche qilmishini keskin eyibleymiz," déyilgen.

Aridin bir kün ötkende xitay hökümiti buninggha naraziliq bildürüp, amérika hökümitining bu bayanlirini ret qilidighanliqini bildürgen. "Yawropa xewerliri" téléwiziyesining 31-dékabirdiki xewiride éytilishiche, xitay tashqiy ishlar ministirliqining bayanatchisi wang wénbin béyjingda ötküzülgen muxbirlarni kütüwélish yighinida roytérs agéntliqining bu heqtiki so'aligha jawab bérip: "Gülshen abbas térorluq teshkilatigha qatnashqan hemde térorluq jinayetlirige yardem bergen. Shundaqla jem'iyet tertipini qalaymiqanlashturush jinayiti sadir qilghan," dégen. Shuning bilen birge amérika hökümitining mushundaq bir "Térorchi" ni aqlishi we qoyup bérishni telep qilishidin özlirining heyran bolghanliqini bildürgen.

Amérikadiki Uyghur pa'aliyetchi roshen abbas bolsa xitay hökümitining mushu xil usulda özining amérikadiki Uyghur dawasi üchün qiliwatqan pa'aliyetliridin "Qisas" éliwatqanliqini tekitleydu. U xitay tashqiy ishlar misnistirliqining bu heqtiki bayanatini keskin ret qilip: "Bir ana hemde pénsiyege chiqqan doxtur bolghan hedem gülshen abbasni nomussizlarche mexpiy sot bilenla térorluqqa chétip 20 yilliq qamaqqa höküm qiliwétish xitayning qanun döliti ‍emeslikini, eksiche uningda höküm süriwatqini qaraqchiliq tebi'iti ikenlikini dunyagha yene bir qétim ashkara qildi." dédi. Shundaqla u özining buningliq bilen Uyghur dawasidin hergizmu toxtap qalmaydighanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet