Америка дөләт мәҗлисидә «шинҗаңдики мәҗбурий әмгәк, зор көләмлик тутқун вә иҗтимаий контрол» мавзулуқ гуваһлиқ бериш йиғини өткүзүлди

Мухбиримиз ирадә
2019-10-17
Елхәт
Пикир
Share
Принт

17- Өктәбир күни америка дөләт мәҗлисидә «шинҗаңдики мәҗбурий әмгәк, зор көләмлик тутқун вә иҗтимаий контрол» темисида бир гуваһлиқ бериш йиғини өткүзүлди.

Бу йиғин америка дөләт мәҗлиси хитай ишлири комитети тәрипидин уюштурулған болуп, униңға сенатор марко рубийо, җим макговрин вә җиф марклий қатарлиқ дөләт мәҗлисиниң әзалири қатнашти. Йиғинда адвокат нури түркәл, тәтқиқатчи адриян зенз, иқтисад вә кишилик һоқуқ мәсилилири мутәхәссиси, профессор майкил поснер, кишилик һоқуқ һәрикити тәшкилатиниң директори әмий леһр қатарлиқлар гуваһлиқ бәрди. Йиғинда сөз қилған сенатор җим макговрин америка һөкүмитиниң уйғурлар үчүн йәниму көп ишларни қилиши керәкликини тәкитләш билән биргә йәнә «америка дөләт мәҗлиси уйғурлар билән биллә,» дәп көрсәтти.

Мәзкур йиғинда уйғур елидә йолға қоюлуватқан «қайта тәрбийә» лагерлири, лагерларда йүз бериватқан паҗиәләр вә шундақла лагер тутқунлириниң зор көләмдә мәҗбурий әмгәккә селиниши қатарлиқ темилар үстидә нуқтилиқ музакириләр елип берилди.

Йиғинда гуваһлиқ бәргән адриян зениз қатарлиқ гуваһчилар мәҗбурий әмгәк мәсилиниң уйғур елидә баш көтүрүп чиқиватқан йәнә бир җиддий мәсилә икәнликини тәкитлиди. Адриян сөзидә уйғур елидики мәҗбурий әмгәккә вә мәҗбурий әмгәк арқилиқ ишләпчиқирилған мәһсулатларниң хәлқара базарға киришини тосуш үчүн нөвәттә қанун болуп мақуллиниш басқучида туруватқан «уйғур кишилик һоқуқ сиясити» қанун лайиһәсидин башқа айрим бир қанун мақуллиниши керәкликини билдүрди.

Йиғинда уйғур елидә йолға қоюлуватқан юқири техникилиқ назарәт системиси, уйғурларға қаритиливатқан дәриҗидин ташқири еғир бесим вә контрол һәмдә бу бесимлар сәвәб болуватқан иҗтимаий һадисиләр инчикә тәпсилатлириғичә оттуриға қоюлди шундақла америка һөкүмити елишқа тегишлик тәдбирләр музакирә қилинди.

Пикирләр (0)
Share
Толуқ бәт