Amérika dölet mejliside "Shinjangdiki mejburiy emgek, zor kölemlik tutqun we ijtima'iy kontrol" mawzuluq guwahliq bérish yighini ötküzüldi

Muxbirimiz irade
2019-10-17
Élxet
Pikir
Share
Print

17- Öktebir küni amérika dölet mejliside "Shinjangdiki mejburiy emgek, zor kölemlik tutqun we ijtima'iy kontrol" témisida bir guwahliq bérish yighini ötküzüldi.

Bu yighin amérika dölet mejlisi xitay ishliri komitéti teripidin uyushturulghan bolup, uninggha sénator marko rubiyo, jim makgowrin we jif markliy qatarliq dölet mejlisining ezaliri qatnashti. Yighinda adwokat nuri türkel, tetqiqatchi adriyan zénz, iqtisad we kishilik hoquq mesililiri mutexessisi, proféssor maykil posnér, kishilik hoquq herikiti teshkilatining diréktori emiy léhr qatarliqlar guwahliq berdi. Yighinda söz qilghan sénator jim makgowrin amérika hökümitining Uyghurlar üchün yenimu köp ishlarni qilishi kéreklikini tekitlesh bilen birge yene "Amérika dölet mejlisi Uyghurlar bilen bille," dep körsetti.

Mezkur yighinda Uyghur élide yolgha qoyuluwatqan "Qayta terbiye" lagérliri, lagérlarda yüz bériwatqan paji'eler we shundaqla lagér tutqunlirining zor kölemde mejburiy emgekke sélinishi qatarliq témilar üstide nuqtiliq muzakiriler élip bérildi.

Yighinda guwahliq bergen adriyan zéniz qatarliq guwahchilar mejburiy emgek mesilining Uyghur élide bash kötürüp chiqiwatqan yene bir jiddiy mesile ikenlikini tekitlidi. Adriyan sözide Uyghur élidiki mejburiy emgekke we mejburiy emgek arqiliq ishlepchiqirilghan mehsulatlarning xelq'ara bazargha kirishini tosush üchün nöwette qanun bolup maqullinish basquchida turuwatqan "Uyghur kishilik hoquq siyasiti" qanun layihesidin bashqa ayrim bir qanun maqullinishi kéreklikini bildürdi.

Yighinda Uyghur élide yolgha qoyuluwatqan yuqiri téxnikiliq nazaret sistémisi, Uyghurlargha qaritiliwatqan derijidin tashqiri éghir bésim we kontrol hemde bu bésimlar seweb boluwatqan ijtima'iy hadisiler inchike tepsilatlirighiche otturigha qoyuldi shundaqla amérika hökümiti élishqa tégishlik tedbirler muzakire qilindi.

Toluq bet