Hawadiki bulghan'ghan zerrichiler xongkongdiki yashan'ghanlargha éghir tehdit salmaqta iken

Muxbirimiz jüme
2016.05.04

Yéngi élan qilin'ghan bir tetqiqat netijisige qarighanda, uzun mezgil hawadiki bulghan'ghan zerrichiler bilen uchrishish xongkongdiki yashan'ghanlarning her xil raklar bilen qaza qilish xetirini téximu ashurghan.

Roytérsning xewer qilishiche, öpke we nepes yolliri rakliridin bashqa, börek, jiger, ashqazan üsti bézi qatarliq raklarni xongkongdiki yashan'ghanlarning jénigha zamin boluwatqan köp xil raklarning aldinqi rétige tizishqa bolidiken.

Tetqiqat doklatini en'gliyediki bérmin'gham uniwérsitéti sehiye instituti teyyarlighan.

Xewerde neqil qilishiche, doklatni teyyarlashqa qatnashqan néyl tomas hawadiki bulghan'ghan ushshaq zerrichilerning nepes arqiliq qan'gha ötüp, bedenning herqandaq yéride yaman süpetlik ösme peyda qilish yoshurun küchige ige ikenlikini bildürgen.

Tetqiqatchilar yuqiriqi netijige xongkongdiki 65 yashtin ashqan 66 ming kishini 1998-yilidin, 2001-yilighiche tekshürüsh we ularni 2011-yilighiche közitish arqiliq érishken.

Amérika ékologiyelik muhitini qoghdash idarisining ölchimi boyiche, hawadiki bulghan'ghan zerrichiler 2.5MP Dep atilidighan bolup, ularning her kubmétir hawadiki yilliq normal zichliqi 12 mikrogramdin ashmasliqi kérek iken.

Doklatta körsitishiche, tekshürüshke qatnashturulghanlarning hemmisi her kubmétir hawadiki zichliqi 34 mikrogram bolghan bulghan'ghan ushshaq zerriche bilen uchrashqan kishiler iken.

Yéshil tinchliq teshkilati yéqinqi doklatida xitaydiki muhiti eng bulghan'ghan 10 sheher ichide 6 sining Uyghur diyarida ikenlikini élan qilghan idi. Ularning körsitishiche, qeshqer hawasidiki bulghan'ghan ushshaq zerrichilerning derijisi belgilen'gen normal chektin 27 hesse éship ketken. Halbuki, Uyghur élidiki bulghinishning yerlik xelqlerning salametlikige qandaq eks tesirlerni élip kélidighanliqi heqqide sistémiliq tetqiqatlarning élip bérilghanliqi hazirche namelum.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.